Kabtanka xulka Argentina, Lionel Messi, ayaa ka badbaaday ganaax suurtagal ah oo ka iman lahaa FIFA, kaddib markii aan loo taagin kaarka cas ciyaartii ay Argentina 3-0 kaga badisay Algeria Arbacadii.
Messi ayaa noqday xiddigga ciyaarta isagoo dhaliyay saddexley (hat-trick) kulankii ay la yeesheen “Desert Foxes”-ka Algeria.
Si kastaba ha ahaatee, 38-jirka ayaa nasiib u yeeshay inaan garoonka laga saarin qeybtii hore ee ciyaarta, kaddib markii uu u muuqday inuu ku dul istaagay kabtanka Algeria, Aïssa Mandi.
Garsooraha reer Poland, Szymon Marciniak, ayaa halkii kaarka casaanka ka siin lahaa Messi, siiyay Algeria laad xor ah (free-kick), waxaana xitaa Messi aan la siin kaar jaalle ah.
Nidaamka VAR-ka ayaana sidoo kale go’aansaday inuusan faragelin, iyadoo la rumeysan yahay in qaladka loo arkay mid taxaddar la’aan ah (careless), balse aan ahayn mid khatar badan ama xoog xad-dhaaf ah lagu adeegsaday.
Difaacii hore ee Manchester City, Nedum Onuoha, ayaa ESPN u sheegay:
“Aniga aragtidayda waxay ahayd kaar cas. Waxaan u maleynayaa in fursadda la seegay, sababtoo ah sawirrada taagan waxay u muuqdeen kuwo aad u xun. Markii ciyaaryahanku dhulka yiillay, waxaad arki kartay in Messi uu ka walwalsanaa xaaladdiisa, maadaama uu ogaa inuu sameeyay fal dhibaato u horseedi karay.”
Haddii Messi la siin lahaa kaarka cas, wuxuu seegi lahaa kulanka xiga ee Group J ee Argentina ay la ciyaari doonto Austria.
Be the first to comment