Lionel Messi ayaa mar kale taariikh cusub dhigay kadib markii uu dhaliyay laba gool, isagoo ka caawiyay Inter Miami inay 4-2 kaga adkaato Atletico San Luis kulankii ugu horreeyay ee heerka guruubyada Leagues Cup 2026.
Xiddiga reer Argentina ayaa sidoo kale noqday gooldhaliyaha ugu badan taariikhda Leagues Cup, isagoo gaaray 14 gool, kana sare maray dhammaan ciyaartoydii hore uga qayb gashay tartankan ay wada ciyaaraan kooxaha MLS iyo Liga MX.
Bilow Degdeg Ah
Atletico San Luis ayaa ciyaarta si fiican ku bilaabatay, iyadoo David Rodriguez uu hoggaanka u dhiibay kooxda daqiiqaddii 4-aad.
Laakiin Messi ayaa si dhaqso leh uga jawaabay, isagoo dhaliyay goolka barbaraha daqiiqaddii 11-aad.
Kadibna khadka dhexe ee reer Venezuela Telasco Segovia ayaa Inter Miami u dhaliyay goolka labaad daqiiqaddii 26-aad, taasoo kooxda gurigeeda ku ciyaaraysay hoggaanka siisay.
Messi Oo Markale Shabaqa Gaaray
Wax yar ka hor dhammaadka qeybtii hore, Messi ayaa dhaliyay goolkiisii labaad ee ciyaarta, halka daafaca reer Brazil Micael uu ku daray goolka afaraad waqtigii dheeriga ahaa ee qeybta hore, iyadoo Inter Miami ay nasashada ku aaday 4-1.
Qeybtii labaad, Rafa Llorente ayaa u dhaliyay Atletico San Luis gool sharaf ah, balse ma uusan beddelin natiijada ciyaarta.
Natiijooyinka Kale Ee Leagues Cup
Kulamadii kale ee Leagues Cup ee isla habeenkaas la ciyaaray:
FC Dallas ayaa 2-0 ku garaacday Queretaro.
Leon ayaa 1-0 uga adkaatay Nashville SC.
Guul Taariikhi Ah
Guushan waxay Inter Miami siisay bilow wanaagsan oo ay ku furato Leagues Cup 2026, halka Lionel Messi uu sii xoojiyay rikoodhkiisa isagoo noqday gooldhaliyaha ugu badan taariikhda tartanka, taasoo mar kale muujisay saamaynta weyn ee uu ku leeyahay kooxda reer Florida.
Be the first to comment