Mikel Arteta ayaa bixiyay war wanaagsan oo ku saabsan xaaladda dhaawac ee Bruno Guimarães, kaas oo seegay kulankii furitaanka Premier League ee Arsenal ay 3-0 kaga adkaatay Coventry City.
Guimarães oo Arsenal xagaagan ugu soo biiray £75 milyan, ayaa dhaawac ka soo gaaray gumaarka intii uu socday kulankii Community Shield ee ay Arsenal kaga adkaatay Manchester City, kadib kulankaas ayaa la arkay isagoo lugta baraf lagu saarayo.
Dhaawaca ayaa sababay inuu seego kulankii Coventry, waxaana markii hore jiray warar sheegayay in xiddiga reer Brazil uu maqnaan karo ilaa lix toddobaad, laakiin Arteta ayaa hadda taageerayaasha Arsenal u sheegay in dhaawacu uusan sidaas u cuslayn.
Markii la weydiiyay haddii Bruno uu maqnaan doono toddobaadyo, Arteta wuxuu yiri: “Maya, maya. Ma filayno inuu toddobaadyo maqnaado haba yaraatee.”
Arteta wuxuu sidoo kale sheegay in Bruno uu doonayay inuu sii ciyaaro xitaa markii uu dhaawacu soo gaaray:- “Xitaa ma uusan rabin inuu joojiyo ciyaarta, Wuxuu rabay inuu sii wato.”
Tababaraha Arsenal ayaa intaas ku daray in kooxda ay hadda si wanaagsan u fahmayso dabeecadda iyo adkeysiga ciyaaryahanka, isagoo sheegay inuusan filayn in dhaawacu noqdo dhibaato weyn.
Arteta ayaa sheegay in Arsenal ay sugayso sida uu Bruno uga soo kabsado dhaawaca inta lagu jiro toddobaadkan. Sidaas darteed, weli lama xaqiijin waqtiga saxda ah ee uu dib ugu soo laabanayo kooxda, balse hadalka Arteta wuxuu meesha ka saarayaa cabsi laga qabay maqnaansho dheer.
Bruno Guimarães ayaa Arsenal muhiim weyn ugu ah qorshaha Arteta, waxaana laga filayaa inuu door muhiim ah ka ciyaaro xilli ciyaareedkan kadib markii kooxda ay Newcastle kaga soo iibsatay lacag dhan £75 milyan.
Be the first to comment