Barcelona ayaa liiskeeda xulashooyinka ku dartay Luis Suárez, weeraryahanka reer Colombia ee u ciyaara Sporting CP, haddii ay ugu dambeyn ku guuldarreysato inay heshiis la gaarto Julián Álvarez, sida uu sheegay Fabrizio Romano, Suárez wuxuu hadda ka mid yahay liiska Barcelona, inkastoo heshiiskiisu uusan fududaan doonin maadaama uu yahay ciyaaryahan muhiim ah oo Sporting ah.
Barcelona weli mudnaanta koowaad waxay siineysaa Álvarez, laakiin haddii xaaladda weeraryahanka Atlético Madrid aysan isbeddelin, Barça waxay bilaabi doontaa inay si dhab ah u qiimeyso Suárez iyo xulashooyin kale laga bilaabo toddobaadka soo socda.
Luis Suárez, oo 28 jir ah, ayaa xilli ciyaareedkii hore Sporting u dhaliyay 38 gool dhammaan tartamada, taasoo ka dhigtay mid ka mid ah weeraryahannada ay Barcelona hadda indhaha ku hayso, waxaa sidoo kale la sheegay in tababare Hansi Flick uu oggol yahay suurtagalnimada saxiixa Suárez haddii qorshaha Álvarez uu burburo.
Dhanka kale, xaaladda Julián Álvarez ayaa weli ah mid adag, iyadoo Atlético Madrid aysan dooneyn inay si fudud u fasaxdo weeraryahanka, halka Álvarez uu hadda dib ugu soo laabtay kooxda, sidaas darteed, Barcelona waxay u muuqataa inay diyaarinayso qorshe kale oo weerarka ah, iyadoo Luis Suárez uu noqday mid ka mid ah magacyada ugu muhiimsan ee liiskaas.
Be the first to comment