Arsenal ayaa mar kale xaqiijisay awooddeeda Premier League, iyadoo kooxda Mikel Arteta sii waddo rikoodho waaweyn iyo bandhigyo cajiib ah oo ay sameeyeen xiddigaha kooxda.
Kooxda Gunners ayaa markii 60-aad ku hoggaamisay kulan Premier League ah oo garoonkeeda Emirates ay ku ciyaarayso ugu yaraan laba gool tan iyo markii Mikel Arteta qabtay kooxda. 59-kii jeer ee hore, Arsenal waxay badisay 58 kulan, halka hal kulan oo keliya barbaro ku dhammaaday, mana jirto wax guuldarro ah.
Dhanka weerarka, Kai Havertz ayaa sii wada qaab ciyaareedkiisa wanaagsan, isagoo gool dhaliyay afar kulan oo xiriir ah markii ugu horreysay tan iyo markii uu yimid kubadda cagta Ingiriiska. Wuxuu shabaqa soo taabtay kulamadii Burnley, Paris Saint-Germain, Manchester City iyo Coventry City.
Garoonka Emirates ayaa sidoo kale noqday qalcad adag, iyadoo Arsenal aan looga badin 45 kulan oo xiriir ah oo Premier League ah marka ay la ciyaareyso kooxaha cusub ee horyaalka kusoo biiray. Inta lagu guda jiray rikoodhkan, Arsenal waxay badisay 40 kulan, halka 5 kulan ay barbaro galeen.
Kabtanka kooxda Martin Ødegaard ayaa 49 daqiiqo gudahood ku barbareeyay tiradii goolasha Premier League ee uu dhaliyay xilli ciyaareedkii hore. Sidoo kale wuxuu gaaray 36 gool oo Premier League ah, isagoo dhaafay halyeeygii Arsenal Cesc Fàbregas, oo lahaa 35 gool.
Xiddiga reer Giriig Christos Tzolis ayaa qeybtii hore ee ciyaarta ahaa ciyaaryahankii ugu saameynta badnaa weerarka, isagoo kubadda 7 jeer ku taabtay xerada ganaaxa isla markaana abuuray 3 fursadood oo goolal loo dhalin karay, waana tiradii ugu badnayd ciyaaryahan kasta kulankaas.
Dhanka kale, Bukayo Saka ayaa sii qoraya taariikh cusub. Wuxuu gaaray 61 gool oo Premier League ah isagoo Arsenal u dhaliyay, taasoo ka dhigaysa inuu dhaafo halyeeygii reer Chile Alexis Sánchez, oo lahaa 60 gool.
Saka ayaa sidoo kale saftay kulankiisii 198-aad ee Premier League intii uu Mikel Arteta tababaraha ahaa, waana ciyaaryahanka ugu safashada badan Arsenal muddadaas, isagoo ugu yaraan 10 kulan ka badan ciyaaryahan kasta oo kale oo kooxda ka tirsan.
Arsenal ayaa sidaas ku muujisay inay tahay mid ka mid ah kooxaha ugu xooggan Premier League xilli ciyaareedkan, iyadoo xiddigaha kooxda ay sii wadaan jebinta rikoodho iyo qorista taariikh cusub.
Be the first to comment