Halyeeygii hore ee xulka England, Gary Lineker, ayaa mar kale noqday hadal-heynta baraha bulshada kadib markii dib loo soo bandhigay qoraal uu sannadkii 2016 ka qoray madaxweynaha FIFA, Gianni Infantino, xilli uu hadda wajahayo dhaleeceyn xooggan.
Qoraalkaas oo uu Lineker daabacay maalintii doorashada madaxweynaha FIFA ayaa u dhignaa:
“Waxaan dareemayaa in Gianni Infantino uu maalin uun iska bixin doono maaskarada, dabadeedna uu isu beddeli doono Sepp Blatter.”
Qoraalkaas ayaa hadda si weyn u faafay, iyadoo taageerayaal badan ay sheegeen inuu Lineker si sax ah u saadaaliyay waxa maanta dhacaya.
Mid ka mid ah taageerayaasha ayaa yiri:
“Waxaad ahayd qof sax ah.”
Qof kale ayaa qoray:
“Gary Lineker wax walba ayuu si sax ah u arkay.”
Taageere saddexaad ayaa isaguna yiri:
“Runtii wuu saadaaliyay arrintan.”
Muranka ayaa yimid kadib markii Gianni Infantino uu soo bandhigay qorshe muran badan dhaliyay oo lagu dhisayo shirkad cusub oo maamuli doonta dhinacyada ganacsiga ee Koobka Adduunka, iyadoo qayb ka mid ah saamigeeda laga iibin doono maalgashadeyaal gaar loo leeyahay.
Lineker ayaa sidoo kale si cad uga horyimid qorshahan, isagoo dib u wadaagay war ku saabsan arrintan kuna daray astaanta matagga (🤮), wuxuuna ku qoray:
“Wax dambe ima yaabin.”
Qorshahan ayaa wajahaya mucaaradad xooggan oo ka timid UEFA, Xiriirka Kubadda Cagta England (FA), taageerayaal iyo shaqsiyaad badan oo caan ka ah kubadda cagta, kuwaas oo ku doodaya in Koobka Adduunka uusan ahayn hanti ganacsi oo la iibin karo, balse uu yahay hanti ay wada leeyihiin taageerayaasha iyo dunida kubadda cagta.
Be the first to comment