Kooxaha Arsenal iyo Manchester United ayaa la sheegay inay si toos ah ugu tartamayaan saxiixa xiddiga Atalanta, Ederson, sida lagu sheegay warbixin kasoo baxday Talyaaniga. Labada kooxood waxay qorsheynayaan inay xoojiyaan khadka dhexe suuqa kala iibsiga xagaaga.
Iyadoo Arsenal ay hiigsaneyso inay ku guuleysato horyaalka Premier League iyo UEFA Champions League xilli ciyaareedkan, Manchester United ayaa iyaduna kaliya labo dhibcood u jirta inay xaqiijiso booska shanta sare.
Labada kooxoodba waxay si firfircoon uga qeyb qaadan doonaan suuqa xagaaga, iyadoo Ederson uu yahay ciyaaryahan ay si weyn u doonayaan.
Sida uu qoray wargeyska Talyaaniga ee TuttoJuve, Ederson “wuxuu galay tartan iibsi”, iyadoo Arsenal iyo Manchester United ay hormuud ka yihiin kooxaha doonaya khadka dhexe ee reer Brazil.
Atletico Madrid ayaa la sheegay inay ka laabatay xiisihii ay u qabtay Ederson sababo la xiriira qiimaha ay dalbanayso Atalanta, kaasoo u dhexeeya €45 milyan ilaa €50 milyan (£43.3m / $58.5m), taas oo ay u arkeen mid aad u sarreysa.
Atletico waxay hadda u jeesatay Wolverhampton Wanderers ciyaaryahankeeda khadka dhexe Joao Gomes.
Warbixinta ayaa sidoo kale sheegtay in Juventus ay xiisaynayso Ederson, iyadoo lagu daray:
“Labada kooxood waxay raadinayaan xoojin tayo leh oo khadka dhexe ah, waxayna u arkaan Ederson mid ku habboon sababtoo ah awooddiisa jireed, firfircoonidiisa, iyo awoodda uu u leeyahay inuu ku soo biiro weerarka.”
Ugu dambeyn, Arsenal iyo Manchester United ayaa diyaar u ah inay sameeyaan dalabyo rasmi ah, iyadoo wadahadallada saxiixa Ederson ay si rasmi ah u bilaabanayaan.
Be the first to comment