Xulka qaranka Portugal ayaa barbaro 1-1 ah la galay Jamhuuriyadda Dimuqraadiga ah ee Congo kulankii koowaad ee heerka guruubyada Koobka Adduunka 2026, kaas oo lagu ciyaaray garoonka NRG Stadium.
Portugal ayaa hoggaanka ciyaarta qabatay daqiiqaddii 6-aad, kadib markii João Neves uu madax qurux badan ku dhaliyay kubbad uu soo karoosay Pedro Neto, taasoo shabaqa Congo gashay.
Daqiiqaddii 45+5, xulka Congo ayaa helay goolka barbaraha, waxaana u dhaliyay Yoane Wissa oo madax xooggan ku dhammeystiray karoos uu soo dhiibay Arthur Masuaku.
Qeybtii labaad ee ciyaarta, Portugal ayaa kordhisay weerarradeeda si ay u hesho goolka guusha, hase yeeshee Cristiano Ronaldo ayaa seegay laba fursadood oo aad u cadcad. Dhanka kale, Congo ayaa iyaduna dhowr jeer halis gelisay goolka uu waardiyaha ka ahaa Diogo Costa.
Bruno Fernandes ayaa ku dhowaaday inuu dhaliyo goolka guusha kadib markii uu meel ka baxsan diilinta ganaaxa ka tuuray laad xooggan, balse kubbadda ayaa wax yar ka ag martay birta goolka.
Ugu dambeyn ciyaarta ayaa ku soo idlaatay barbaro 1-1 ah.
Natiijadan ayaa ka dhigan in labada xulba ay heleen min hal dhibic kulankoodii ugu horreeyay ee tartanka Koobka Adduunka 2026.
Be the first to comment