Man City Iyo Arsenal Oo Guulo Ugu Jawaabay Hogaamiyayaasha Horyaalka Ee Liverpool.

Kooxaha Man City iyo Arsenal ayaa guulo ka kala gaadhay kooxaha Southampton iyo Fulham kulamo ka tirsanaa premier League.

Kooxda Fulham ayaa man City kaga naxsatay gool Daqiiqadii 26-aad waxana u dhaliyay xiddiga Andreas Pereira kaas oo hogaanka u dhiibay kooxdiisa.

Laakiin xiddiga khadka dhexe ee Mateo Kovacic ayaa jawaab deg-deg ah ka bixiyay isaga oo daqiiqadii 32-aad u dhaliyay kooxdiisa goolka bar-baraha isgaa oo ciyaarta ka dhigay 1/1.

Qaybtii dambe ayay Man City si dar-dar leh ku bilaabatay ciyaarta waxana hogaanka u dheereeyay xiddiga Mateo Kovacic kaas oo ciyaarta ka dhigay 2/1.

Xiddiga Jeremy Doku ayaa daqiiqadii 82-aad dhaliyay goolka uu ciyaarta ku dilay isaga oo kooxdiisa u hibeeyay 3-da dhibcood ee ciyaarta.

Daqiiqadii 88-aad ayay Fulham dhalisay gool waxana u dhaliyay Rodrigo Muniz kaas oo ciyaarta ka dhigay 3/2.

Dhinaca kale kooxda Arsenal ayaa guul soo laabasho leh ka gaadhay kooxda Southampton kulan ka dhacay Emirates.

Southampton ayaa daqiiqadii 55-aad ee qaybta dambe gool dhalisay waxana u dhaliyay xiddiga Cameron Archer kaas oo hogaanka u dhiibay kooxdiisa.

Laakiin Arsenal ayaa daqiiqadii 58-aadba dhalisay goolka waxana u dhaliyay xiddiga Kai Havertz kaas oo ciyaarta ka dhigay 1/1.

Xiddiga Gabriel Martinelli ayaa daqiiqadii 68-aad dhaliyay goolka 2-aad ee kooxdiisa waxana uu ciyaarta ka dhigay 2/1.

Xiddiga Bukayo Saka ayaa soo afjaray goolasha kooxdiisa isaga oo gool u dhaliyay daqiiqadii 88-aad ee ciyaarta.

Waxa sidaas ku dhamaatay ciyaarta oo ay Arsenal guul ka gaadhay kooxda Southampton.