Tababarka kooxda Real Madrid maanta oo Khamiis ah ayaa waxaa booqasho gaar ah ugu yimid tababarihii hore ee kooxda, Carlo Ancelotti, kaas oo haatan ah tababaraha xulka qaranka Brazil, Ancelotti ayaa xarunta tababarka Real Madrid ee Valdebebas ku tagay iyadoo kooxda Los Blancos ay isku diyaarinayso kulanka ay berri oo Jimce ah la ciyaari doonto Real Betis magaalada Sevilla, kulan ka tirsan horyaalka La Liga.
Intii uu ku guda jiray booqashadiisa, Ancelotti wuxuu salaamay dhammaan ciyaartoyda Real Madrid, balse wuxuu si gaar ah ula kulmay saddexda ciyaaryahan ee reer Brazil, Endrick, Rodrygo iyo Éder Militão, kuwaas oo haatan kasoo kabanaya dhaawacyo.
Tababaraha reer Talyaani ayaa saddexda ciyaaryahan kala hadlay xaaladdooda caafimaad, isagoo wax ka weydiiyay sida uu u socdo soo kabashadooda, Ancelotti ayaa horey ula soo shaqeeyay dhammaan ciyaartoydan intii uu hoggaaminayay Real Madrid.
Waxaa sidoo kale la arkayay Ancelotti oo si diirran ula hadlay José Mourinho, oo haatan ah tababaraha Real Madrid, iyadoo sawirrada kulankooda ay si weyn ugu faafeen baraha bulshada.
Carlo Ancelotti, en la Ciudad Real Madrid.https://t.co/ye438y9bbH
— Real Madrid C.F. (@realmadrid) September 3, 2026
Booqashada Ancelotti ayaa muhiimad gaar ah ku leh Real Madrid, maadaama uu weli xiriir wanaagsan la leeyahay kooxda iyo shaqsiyaad badan oo ku dhex jira naadiga.
Ancelotti ayaa booqashadan ku tagay Madrid isagoo socdaal Yurub ah kula jira xubnaha shaqaalaha farsamada ee xulka Brazil. Ujeeddadu waa inay si dhow ula socdaan ciyaartoyda Brazil u dhalatay ee ka ciyaara horyaallada Yurub, iyagoo isku diyaarinaya kulamada caalamiga ah ee soo socda.
Tababaraha Brazil ayaa sidoo kale doonayay inuu xog ka helo xaaladda ciyaartoydiisa, gaar ahaan Rodrygo, Militão iyo Endrick, kuwaas oo dhammaantood xiriir dhow oo hore ula lahaa intii uu Ancelotti maamulayay Real Madrid.
Ancelotti ayaa xulka Brazil la kulmay caqabado dhaawacyo ah tartankii Koobka Adduunka ee ugu dambeeyay, iyadoo Rodrygo iyo Militão ay ka maqnaayeen tartanka dhaawacyo awgood. Endrick ayaa inta badan loo adeegsaday beddel, halka Vinícius Júnior uu ahaa mid ka mid ah ciyaartoyda muhiimka ah ee Brazil.
Be the first to comment