Guusha weyn ee Arsenal xilli ciyaareedkan waxaa si weyn loogu sababeyn karaa sida firfircoon ee ay uga shaqeeyeen suuqa kala iibsiga xagaagii hore.
Kooxda ayaa jabiyay rikoor-koodii kharashaadka, iyagoo ku bixiyay in ka badan £250 milyan, taas oo door muhiim ah ka ciyaartay bilowgii ku dhowaad kaamilka ahaa ee ay sameeyeen ciyaartoyda uu hoggaamiyo Mikel Arteta.
Arsenal waxay hogaaminayeen labadaba Premier League iyo UEFA Champions League, sidoo kale waxay gaareen finalka Carabao Cup.
Tani waxay muujinaysaa in maalgashigii weynaa ee kooxda uu si toos ah u saameeyay waxqabadkooda sare ee xilli ciyaareedkan.
Si kastaba ha ahaatee, dhibaatooyinka kooxda Arsenal ayaa soo shaac baxay tan iyo bishii Janaayo, taas oo muujinaysa in agaasimaha ciyaaraha Andrea Berta uu weli shaqo badan hayo xagaagan.
Kooxda Gunners ayaa weli la ildaran dhaawacyo badan, kuwaas oo si cad u muujiyay toddobaadyadii u dambeeyay in qaar ka mid ah ciyaartoyda keydka ahi aysan ku filnayn inay mas’uuliyadda qaadaan marka loo baahdo.
Arrintani waxay halis gelisay rajadooda ku aaddan inay ku guuleystaan wax koob ah xilli ciyaareedkan.
Tani waxay muujinaysaa in Arsenal ay u baahan tahay inay sameyso isbeddel weyn xagaagan, oo ay ku jirto nadiifin ciyaartoy iyo sidoo kale saxiixyo cusub, si ay horumar uga sii sameeyaan halka ay hadda joogaan—iyadoo aan loo eegin sida uu xilli ciyaareedkan ku dhammaado.
Warbaahinta Mirror Football ayaa eegaysa saddex tallaabo oo muhiim ah oo ay tahay in maamulka Arsenal ay qaadaan bilowga suuqa kala iibsiga ee soo socda, kaas oo furmaya bisha June, si ay u xaqiijiyaan xagaag guul leh.
Iibinta ciyaartoyda aan loo baahnayn
Agaasimaha ciyaaraha Andrea Berta ayaa hore u muujiyay inuu keeni karo saxiixyo waaweyn, balse awooddiisa ah inuu helo kooxo iibsada ciyaartoyda aan la rabin ee Arsenal ayaa ahayd mid liidata xagaagii hore.
Marka la barbar dhigo kooxaha kale ee tartamaya, Arsenal waxay ku liidatay iibinta ciyaartoyda, arrin soo jiitamaysay tan iyo waqtigii Edu Gaspar.
Tani waa inay is beddeshaa xagaagan, maadaama Arsenal ay u baahan tahay inay iibiso ciyaartoy si ay u hesho dhaqaale cusub—iyadoo la tixgelinayo lacagtii badnayd ee ay ku bixiyeen xagaagii hore iyo kharashaadka ay qorsheynayaan sanadkan.
Sida ay sheegtay The Athletic, iibka ciyaartoydu waa mid aad muhiim u ah si loo helo awood dhaqaale oo lagu sameeyo saxiixyo cusub. Sidaas darteed, Berta waa inuu si degdeg ah u bilaabo iibinta ciyaartoyda aan wax badan ku kordhin kooxda.
Arsenal ayaa la filayaa inay sameyso go’aamo adag oo ku saabsan qaar ka mid ah ciyaartoydeeda xagaagan.
Waxaa la filayaa in Gabriel Jesus iyo Ben White la iibiyo, halka midkood Gabriel Martinelli ama Leandro Trossard sidoo kale la fasixi karo kadib xilli ciyaareed niyad jab leh.
Sidoo kale, haddii dalab wanaagsan la helo ciyaartoyda ka soo baxay akadeemiyada sida Ethan Nwaneri ama Myles Lewis-Skelly, Arsenal waxay ka fiirsan kartaa inay iibiso, maadaama lacagta laga helo ay noqon doonto faa’iido saafi ah (pure profit).
Tani waxay ka mid tahay qorshaha kooxda ee lagu xoojinayo dhaqaalaha iyo dib-u-habaynta kooxda ka hor suuqa kala iibsiga xagaaga.
Saxiixa Ederson
Arsenal waxay si cad ugu baahan tahay khad dhexe oo dheeri ah, waxaana la aaminsan yahay in Ederson uu noqon karo xalka dhibaatadaas.
Kooxda Gunners ayaa si weyn ugu tiirsaneyd Martin Zubimendi iyo Declan Rice, balse arrintaas ma aha mid waarta mustaqbalka fog, gaar ahaan marka la eego daalka, dhaawacyada iyo tirada kulamada badan.
Sidaas darteed, keenista ciyaaryahan sida Ederson oo leh awood jireed, shaqo badan iyo difaac adag ayaa siin karta Arsenal dheelitirnaan iyo qoto dheer (depth) ay uga baahantahay khadka dhexe xilli ciyaareedyada soo socda.
Inkasta oo Christian Norgaard la keenay xagaagii hore, haddana Mikel Arteta si buuxda uma aaminsana inuu door weyn ka ciyaaro Arsenal. Norgaard weli lama siin bilow kulan Premier League ah xilli ciyaareedkan, taas oo muujinaysa inuusan ka qaadin culayska Declan Rice ama Martin Zubimendi.
Tani waxay caddeyneysaa in Arsenal ay durba raadinayso ciyaaryahano cusub oo si toos ah ugu soo biiri kara safka koowaad xilli ciyaareedka dambe.
Sandro Tonali oo ka tirsan Newcastle United ayaa lala xiriirinayay Arsenal tan iyo january, balse qiimaha sare ee lagu sheegay £80–100 milyan ayaa ka dhigaya mid adag.
Taa beddelkeeda, Ederson oo ka tirsan Atalanta ayaa u muuqda xulasho macquul ah. Ciyaaryahanka 26-jirka ah waxaa lagu qiimeeyaa ku dhowaad £43 milyan, balse kooxaha daneynaya—oo ay ku jiraan Arsenal iyo Manchester United—waxay aaminsan yihiin inay ku heli karaan qiyaastii £10 milyan ka yar.
Sida ay sheegtay The Athletic, Ederson oo hal sano oo kaliya uga harsan tahay qandaraaskiisa islamarkaana aan la filayn inuu cusbooneysiiyo, waxaa la filayaa inuu ka tago Atalanta ka hor FIFA World Cup. Tani waxay fursad siinaysaa Arsenal inay si degdeg ah u dhammeystirto heshiiska bilowga suuqa kala iibsiga haddii ay go’aansato inuu ku filan yahay kooxda.
Ederson ayaa soo maray kooxo ay ka mid yihiin Cruzeiro, Corinthians iyo Salernitana ka hor inta uusan ku biirin Atalanta bishii June 2022.
Tan iyo markaas, wuxuu diiwaangeliyay 15 gool iyo 5 caawin 177 kulan, isagoo ka caawiyay Atalanta inay ku guuleysato UEFA Europa League laba xilli ciyaareed ka hor, isla markaana ay sii xajistaan sumcaddooda ah koox si joogto ah ugu jirta afarta sare.
Soo iibsiga garab weerar oo heer sare ah
Arsenal waxay si weyn ugu baahan tahay garab bidix oo tayo sare leh xagaagan.
Dhibaato weyn oo kooxda haysatay muddadii Mikel Arteta ayaa ahayd la’aanta weeraryahano beddeli kara ciyaarta (game-changers).
Saxiixyadii weerarka ee xagaagii hore—Viktor Gyokeres iyo Noni Madueke—ma aysan keenin saameyntii la filayay xilli ciyaareedkan, taasoo ka dhigaysa in raadinta ciyaaryahan heer sare ah oo garabka ah ay weli socoto.
Tani waxay muujinaysaa in Arsenal ay u baahan tahay xiddig cusub oo leh xawaare, hal-abuur iyo awood uu ku go’aamiyo ciyaaraha waaweyn si ay u gaarto heerka xiga.
Dhibaatada ugu weyn ee Arsenal weli waa garabka bidix, maadaama aysan jirin ciyaaryahan si joogto ah u qabsaday booskaas, taas oo ka dhigaysa meel daciif ah oo kooxda ka mid ah.
Mikel Arteta iyo Andrea Berta waa inay raadiyaan ciyaaryahan leh hal-abuur iyo awood uu ciyaarta beddeli karo—xitaa heer “world-class” ah.
Inkasta oo ay adag tahay in la helo ciyaartoy noocaas ah suuqa, Arsenal waxay muddo dheer xiisaynaysay:
Nico Williams
Bradley Barcola
Anthony Gordon
Ilaa hadda ma jiraan wada-hadallo rasmi ah oo la xaqiijiyay, balse saddexdan ciyaaryahan midkood kasta wuxuu noqon karaa saxiix weyn (marquee signing) oo si weyn u xoojin kara weerarka Arsenal.
Newcastle United ayaa la filayaa inay iibiso Gordon xagaagan qiimo ku dhow £75 milyan, halka Paris Saint-Germain laga yaabo in Bradley Barcola uu raadiyo bixitaan maadaama uusan helin daqiiqado badan oo joogto ah.
Sidoo kale, weriyaha suuqa kala iibsiga Fabrizio Romano ayaa dhawaan sheegay in Arsenal aysan ku ekaan doonin hal garab bidix oo cusub, balse ay suuragal tahay inay saxiixaan weeraryahan labaad xagaagan.
Taas waxay muujinaysaa in Arsenal ay qorsheyneyso dib-u-dhis weyn oo weerarka ah si ay ugu tartanto koobabka si dhab ah xilli ciyaareedka dambe.
Be the first to comment