Jose Mourinho Oo Go’aan Ka Gaadhay Wararka La Xidhiidhinaya Real Madrid.

Tababaraha Benfica, Jose Mourinho, ayaa doonaya inuu noqdo tababaraha xiga ee Real Madrid.

Arrintan waxaa shaaciyay khabiirka suuqa kala iibsiga ciyaartoyda Fabrizio Romano qoraal uu ku daabacay Facebook.

Sida uu sheegay, Mourinho wuxuu muddo dheer doonayay inuu mar kale ku laabto Real Madrid.

Mourinho, oo hore u soo tababaray Real Madrid, ayaa marar badan lala xiriiriyay inuu dib ugu laaban karo kooxda ka dhisan LaLiga.

Real Madrid ayaa doonaysa inay magacawdo tababare cusub oo beddela Alvaro Arbeloa dhamaadka xilli ciyaareedkan.

Isagoo ka hadlayay arrintan, Romano wuxuu yiri:

“Mourinho si buuxda ayuu u doonayaa, wuxuuna u furan yahay inuu dib ugu laabto Real Madrid.

Waa rabitaan uu Jose Mourinho leeyahay inuu maalin uun ku laabto Real Madrid, sidaas darteed suurtagalnimada inay arrintani dhacdo xagaagan waxay noqon lahayd mid aad u soo jiidasho leh ‘The Special One’.”