Manchester United ayaa qaaday tallaabo weyn oo ay ku doonayso inay ku soo qaadato khadka dhexe ee Brighton, Carlos Baleba. Sida uu sheegay wariyaha The Athletic ee lagu kalsoon yahay David Ornstein, United ayaa Brighton u dirtay dalab ku dhow £60 milyan, oo u dhiganta in ka badan €70 milyan, iyadoo ay raacayaan qiyaastii £5 milyan oo gunnooyin ah.
Si kastaba, heshiis rasmi ah oo labada kooxood dhexmaray weli lama gaarin, Dalabka Manchester United wuxuu ka hooseeyaa qiimaha Brighton ay doonayso, laakiin wada-hadalladu waa kuwo wanaagsan, waxaana United la filayaa inay sii waddo dadaalkeeda si heshiiska loo dhammeystiro.
Baleba ayaa muddo dheer ahaa bartilmaameedka Manchester United. 22-jirka reer Cameroon ayaa la sheegay inuu doonayay inuu u dhaqaaqo Old Trafford tan iyo xagaagii 2025, waxaana hadda mar kale dib loo soo nooleeyay dadaalka lagu doonayo saxiixiisa.
Warbixinno kale ayaa sheegaya in shuruudaha shaqsiga ah ee Baleba aysan ahayn caqabadda ugu weyn, iyadoo ciyaaryahanku doonayo inuu ku biiro United, Caqabadda hadda taagan waa in Manchester United iyo Brighton ay isku afgartaan qiimaha ugu dambeeya.
Baleba wuxuu Manchester United siin karaa waxa ay muddo ka raadinaysay khadka dhexe: xoog, orod, kubbad-dagaal, iyo awood uu ku daboolo meel ballaaran oo dhexe. United ayaa xagaagan horey u xoojisay khadkeeda dhexe, waxaana Baleba uu noqon karaa qayb kale oo muhiim ah oo ka mid ah dib-u-dhiska kooxda.
Laakiin heshiiskani weli ma gaarin heerka “Here we go”. Dalab ayaa jira, wada-hadallo ayaa socda, laakiin Brighton weli ma aysan aqbalin. Sidaas darteed, tallaabada xigta waxay u badan tahay dalab cusub oo United ay ku qancineyso kooxda Brighton.
Be the first to comment