Liverpool ayaa go’aan muhiim ah ka qaadatay liiskeeda Champions League, iyadoo xiddiga reer Talyaaniga ee Federico Chiesa laga reebay 25-ka ciyaaryahan ee kooxda u matalaya tartanka Yurub, Chiesa ayaa mar kale wajahaya xaalad adag tan iyo markii uu ku biiray Liverpool, Tababaraha cusub ee kooxda, Andoni Iraola ayaan ku darin liiska Champions League, taas oo sii kordhinaysa su’aalaha laga qabo doorka uu xiddigan ku leeyahay qorshaha cusub ee kooxda.
Xiddiga reer Talyaani ayaa sidoo kale seegay labadii kulan ee ugu horreeyay Premier League xilli ciyaareedkan sababo la xiriira dhaawac muruqa ah, Intaa waxaa dheer, Liverpool waxay xagaagan kusoo kordhisay weerarkeeda ciyaartoy ay ka mid yihiin Bradley Barcola iyo Victor Muñoz, taas oo sii adkaynaysa tartanka boosaska weerarka.
Arrintan ayaa Chiesa xusuusinaysa wixii hore uga dhacay Liverpool, xilli tababarihii hore ee kooxda Arne Slot uu sidoo kale mar ka reebay liiska Champions League, Markaas ayuu Chiesa dib ugu soo laabtay liiska kadib dhaawac culus oo soo gaaray Giovanni Leoni, laakiin markan, Liverpool waxay go’aansatay inay liiska ku darto qaar ka mid ah ciyaartoyda dhaawacan. Conor Bradley, Giovanni Leoni iyo Hugo Ekitike ayaa dhammaantood lagu daray, taas oo muujinaysa in kooxda ay rajaynayso inay soo laabtaan inta uu socdo wareegga horyaalka Champions League.
Dhanka kale, khadka dhexe ee reer Japan Wataru Endo isaguna liiska waa laga reebay, iyadoo James McConnell loo doortay inuu booskiisa ka mid noqdo kooxda Champions League, Go’aanka Liverpool wuxuu sidoo kale la xiriiraa xeerarka UEFA ee ku saabsan tirada ciyaartoyda iyo kuwa kooxda lagu soo tababaray. Sidaas darteed, kooxda ayaa ku qasbanaatay inay si taxaddar leh u doorato 25-ka ciyaaryahan ee tartanka Yurub ka qaybgalaya.
Liverpool ayaa Champions League-ga ku bilaabanaysa kulan adag oo ay Anfield ku wajahdo Atletico Madrid, iyadoo indhaha lagu hayn doono sida uu Iraola u isticmaalo ciyaartoyda uu doortay, laga reebay liiska Champions League macnaheedu ma aha in Chiesa uu si toos ah uga baxay Liverpool, balse go’aankan ayaa sii kordhinaya shakiga ku saabsan mustaqbalkiisa iyo inta fursad ee uu ka heli doono kooxda xilli ciyaareedkan.
Be the first to comment