Halyeeyga Manchester United, Wayne Rooney, ayaa uga digay Arsenal in soo laabashada qaab-ciyaareed ee weeraryahanka Manchester City, Erling Haaland, ay noqon doonto mid “cabsi leh” oo ku wajahan Gunners-ka.
Tani waxay timid kaddib markii Haaland uu hoggaamiyay kooxda Pep Guardiola si ay 2-1 ugu garaacdo Liverpool kulan ka tirsanaa Premier League oo Axaddii ka dhacay garoonka Anfield.
Xiddiga reer Norway ayaa dhaliyay goolka guusha ee Cityzens-ka kulankaas ay ka badiyeen Reds-ka, taasoo keentay in Man City ay hadda lix dhibcood ka dambeeyaan hoggaamiyeyaasha horyaalka ee Arsenal.
Isagoo ka hadlayay barnaamijka BBC ee Match of the Day, Rooney wuxuu yiri:
“Haaland ayaa abuuray goolka barbaraha, wuxuuna dhaliyay rigooradii cadaadiska badnayd, taasoo Manchester City ku sii haysay tartanka hanashada Premier League.”
Rooney ayaa sidoo kale tilmaamay in tani ay ahayd goolkii ugu horreeyay ee Haaland uu ka dhaliyo Anfield tan iyo markii uu ku biiray Man City, isagoo raaciyay:
“Waxaad wajigiisa ka arki kartay farxadda iyo nafiska uu dareemayay.”
Wuxuu sii yiri:
“Kalsoonida uu goolkaas siin doono hadda waxay noqon doontaa mid cabsi gelinaysa Arsenal toddobaadyada soo socda.”
Manchester City ayaa hadda ku jirta boos ay lix dhibcood ka hooseyso Arsenal oo hoggaaminaysa kala sarreynta Premier League.
Be the first to comment