Man City Oo Laga Diiday Codsi Ku Aadan Final-ka Carabao Cup-ka Ka Hor Kulanka Arsenal.

Manchester City ayaa codsigeedii ahaa in Marc Guehi loo oggolaado inuu ciyaaro finalka Carabao Cup ee ay la ciyaari doonaan Arsenal March 22, lagu diiday sida uu sheegay Pep Guardiola iyo warbaahinta ciyaaraha.

Guehi, oo bishii January ka yimid Crystal Palace, looma diiwaan gelin waqtigii loo baahnaa si uu ugu ciyaaro tartankan, maadaama uu ku biiray City kaddib lugtii hore ee semi-finalka. Sidaas darteed, xeerarka EFL/Carabao Cup ayaa ka dhigaya inuusan u qalmin inuu ka qayb galo finalka.

Guardiola ayaa muujiyay cadho iyo niyad-jab isagoo sheegay inuusan fahmin sababta loo diiday ciyaartoyga, maadaama uu yahay xubin ka tirsan kooxda oo ay bixiyaan mushaharkiisa, balse EFL ayaa xaqiijisay inaysan wax ka beddeli doonin xeerarka tartanka.

Sababta ka dambaysa diidmada waxaa weeye xeerka EFL ee oggolaanaya ciyaartoy inuu ka ciyaaro tartanka laba kooxood kaliya haddii uu ku biiray ka hor lugtii hore ee semi-finalka — xaaladdan oo kale, Guehi wuu ku guuldareystay shuruuddaas, sidaas darteed ma ciyaari karo finalka.

Guardiola ayaa weli rajeynaya inuu codsado ogolaansho rasmi ah, laakiin wararka ayaa tilmaamaya in EFL aysan beddeli doonin xeerarka xilli tartanku socdo.

Xeerarka EFL ayaa wax laga beddelay xilli-ciyaareedkan, taasoo ka dhigan in ciyaartoygu uu u ciyaari karo laba kooxood oo kala duwan tartanka gudaheeda hal xilli-ciyaareed. Taas ayaana sababtay in Antoine Semenyo uu u safto labada lug ee semi-finalka City kaga hortimid Newcastle United.

Si kastaba ha ahaatee, maadaama Marc Guehi uu ku soo biiray Etihad Stadium heshiis lagu qiimeeyay ku dhowaad £30 milyan kaddib lugtii hore, waxaa laga reebay lugtii labaad iyo sidoo kale finalka bisha soo socota.

Guardiola arrintaasi aad uguma farxin, wuxuuna shaaca ka qaaday in madaxda Manchester City ay la xiriiri doonaan EFL si ay isku dayaan in go’aankaas dib looga noqdo.

Si kastaba ha ahaatee, codsiyadii City dhego la’aan ayay ku dhaceen, iyadoo Horyaalka (EFL) uu ku adkaystay in aysan jiri doonin wax isbeddel ah oo lagu sameeyo xeerka si loogu oggolaado Guehi inuu ciyaaro.