Virgil van Dijk ayaa ku adkaystay in Liverpool “aysan quusan doonin” difaacashada horyaalka, isagoo sheegay inay “diyaar u yihiin dagaal weyn” oo ay la galaan Arsenal iyo Manchester City si ay ugu tartamaan koobka Premier League.
Rajadii Liverpool ee difaacashada horyaalka ayaa mar kale hoos u dhacday, kadib markii ay Axaddii la kulmeen guuldarro xanuun leh oo 3-0 ah oo ka dhacday garoonka Etihad.
Kooxda uu hoggaamiyo Arne Slot ayaa kasoo gashay labo guulood oo xiriir ah kahor safarkooda Manchester, balse taasi wax saamayn ah kuma yeelan kulankan, maadaama ay si cad ugu liiteen ciyaarta.
Iyadoo Manchester City ay dib ugu soo laabatay kaalinta labaad ee Premier League — afar dhibcood oo kaliya ka dambeysa Arsenal — kooxda Liverpool ayaa ku jirta kaalinta siddeedaad kahor fasaxa ciyaaraha caalamiga ah, iyadoo siddeed dhibcood ka hooseysa hoggaanka.
Arsenal ayaa ahayd kooxda ugu muuqata England xilli ciyaareedkan, balse Sabtidii waxay lumisay laba dhibcood kadib barbarahii ay la gashay Sunderland.
Isagoo hadlay kadib guuldarradii shanaad ee Liverpool ay la kulanto 11-kii kulan ee horyaalka, kabtanka Anfield, Virgil van Dijk, ayaa yiri: “Wax walba waxay ku saabsan yihiin helitaanka joogteyn iyo sii wadista dadaalka. Hadda waxaan aadeynaa wadamadeenna (kulamada caalamiga ah), waa inaan caafimaad qabnaa oo diyaar u noqonnaa orod adag oo naga horreeya markaan soo noqono.”
“Waxba kama quusan doonno haba yaraatee. Weli waa bisha November, waxaana diyaar u nahay xilli ciyaareed dheer iyo dagaal weyn”
“Qaybtii hore ee ciyaarta way adkayd, iyaga ayaana si raaxo leh kubadda u maamulayay, waxaana adkayd in wiilashu cadaadis saaraan”
“Ma filayo inay khatar badan jirtay, balse Doku wuu ciyaaray si fiican, waana u adkayd Conor [Bradley] mararka qaar marka uu hal-hal ula ciyaaray. Ma oran karo inaan dhibaato weyn ku jirnay, balse si ka wanaagsan ayaan u ciyaari karaynay.”
Be the first to comment