Goobta Anfield ayaa diyaar u ah kulan culus oo Yurub ah fiidnimada Salaasada, iyadoo Liverpool ay ku soo dhoweynayso Real Madrid magaalada Merseyside.
Real Madrid ayaa ka tanaasulaysa tababarka caadiga ah ee ka hor ciyaarta ee garoonka Anfield ka hor kulanka Champions League ee Salaasada, iyagoo doorbidaya inay tababarkooda ugu dambeeya ku qaataan xaruntooda tababarka ee Valdebebas ee magaalada Madrid.
Xabi Alonso ayaa sharxay in go’aankan la gaaray si kooxda loogu daayo jawigooda caadiga ah, lagana fogeeyo mashquulka “in ka badan 200 kamaradood” oo sida caadiga ah ku wareegta kooxaha martida ah ka hor ciyaaraha waaweyn ee noocan ah.
Si kastaba ha ahaatee, Alonso weli waa waajib in uu kasoo qayb galo shirkiisa jaraa’id ee ka hor ciyaarta ee ka dhici doona Anfield, taasoo waafaqsan xeerarka UEFA.
Ka hor kulanka waxa kooxda haysata dhibaato dhaawac iyada oo ay ka maqan yihiin xiddigo muhiim ah.
Alexander Isak – maqan
Weeraryahanka reer Iswiidhan ayaa dhaawac muruqa ah kaga maqnaa tan iyo guushii Liverpool ee Champions League ay ka gaartay Eintracht Frankfurt bishii hore.
Wuxuu ka maqnaa saddexdii ciyaarood ee ugu dambeysay waxaana shaki laga qabaa inuu diyaar u noqon doono ciyaarta Salaasada fiidkii. Waxaana la xaqiijiyey inuusan ka qaybgelin tababarkii kooxda ee Isniintii galabnimo ka hor kulanka Real Madrid.
Jeremie Frimpong – maqan
Daafaca midig ee reer Holland ayaa la kulmay dhaawac muruqa bowdada ah 19 daqiiqo gudahood markii Liverpool ay 5-1 ku garaacday Eintracht Frankfurt. Tan iyo markaas kama ciyaarin, waxaana la filayaa inuu maqnaado ilaa lix toddobaad, iyadoo bartamaha bisha December la saadaalinayo inuu soo laaban karo.
Alisson Becker – maqan
Goolhayaha reer Brazil ayaa muddo bil ah ka maqnaa garoomada kadib dhaawac muruqa bowdada ah oo uu ku soo gaaray guuldarradii Champions League ee Liverpool kala kulantay Galatasaray.
Alisson waxa uu seegay lixdii kulan ee ugu dambeeyay, waxaana la filayaa inuu soo laaban doono kaddib nasashada ciyaaraha caalamiga ah ee bisha November.
Giovanni Leoni – maqan
Daafaca dhexe ee 18-jirka ah ee reer Talyaani ayaa weli ka soo kabanaya dhaawac halis ah oo ACL ah oo uu qabo tan iyo bilowgii xilli-ciyaareedkan intii lagu jiray Carabao Cup.
Stefan Bajcetic – maqan
Ciyaaryahanka khadka dhexe ee reer Spain ayaa weli ku jira soo kabashada qalliinka muruqa bowdada oo uu maray bishii May, waxaana uu weli ku maqan yahay isagoo ku guda jira diyaarinta soo laabashadiisa tartanka.
Be the first to comment