FC Barcelona ayaa xagaagii lasoo dhaafay 80 milyan oo euro kula soo wareegtay Anthony Gordon, kaasoo kooxda uga yimid Newcastle United heshiis shan sano ah, Sida ay daabacday Sport, Gordon wuxuu noqday mid ka mid ah saxiixyadii ugu horreeyay ee lagu hirgeliyo siyaasadda cusub ee Barcelona ee ah in wada-xaajoodyada suuqa kala iibsiga lagu qabto sir buuxda, si aan xogtu ugu gudbin warbaahinta.
Agaasimaha ciyaaraha Barcelona, Deco, ayaa 21-kii April u safray London si uu uga shaqeeyo xoojinta weerarka kooxda. Gordon iyo João Pedro ayaa labaduba ka mid ahaa ciyaartoydii la tixgelinayay, Deco ayaa wakiillada Gordon u sheegay inuu si weyn u qiimeeyo awoodda ciyaaryahanka, isaga oo aaminsanaa inuusan ahayn garab keliya, balse uu sidoo kale si fiican uga ciyaari karo weeraryahan dhexe.
Warbixintu waxay sheegtay in saxiixa Gordon uusan wax xiriir ah la lahayn mustaqbalka Raphinha, balse Deco uu doonayay ciyaaryahan awood u leh inuu ka ciyaaro labada boos ee garabka iyo weerarka dhexe, tababaraha Barcelona Hansi Flick ayaa si toos ah ula xiriiray Gordon, waxaana la sheegay in wada-hadalkooda uu door muhiim ah ka qaatay go’aanka xiddiga reer England ee ah inuu u wareego Barcelona.
Gordon ayaa markii dambe, kadib wadahadallo uu la yeeshay Deco iyo wakiilladiisa, aad ugu qancay fikradda ah inuu ku biiro kooxda reer Catalonia, 26-kii May, Deco ayaa mar kale u safray London. Inkastoo wararku xilligaas sheegayeen in safarkiisu la xiriiray João Pedro, haddana ujeeddada dhabta ah waxay ahayd in la soo gabagabeeyo heshiiska Anthony Gordon.
Deco wuxuu kulan kale la yeeshay wakiillada Gordon, Will Salthouse iyo Adam Dodd, waxaana kulankaas lagu dhammeystiray faahfaahintii heshiiska, Sport ayaa sidoo kale amaantay sida degdegga ah ee Gordon ula qabsaday Barcelona, 25-jirkan ayaa isla markiiba fahmay falsafadda Flick, wuxuuna noqday khatar joogto ah oo ka timaadda garabka bidix, isagoo sidoo kale fursado badan u abuura saaxiibadiis, Sidaas darteed, Gordon ayaa hadda bilaabay inuu caddeeyo sababtii Deco uu ugu adkeystay saxiixiisa, iyadoo ciyaaryahanka reer England uu noqon karo mid ka mid ah xiddigaha ugu waaweyn ee Barcelona xilli ciyaareedkan.
Be the first to comment