Maamulka sare Ee Kooxda Chelsea ee BlueCo ayaa la sheegay inay oggolaatay inay aqbasho dalab muhiim ah oo uu codsaday Xabi Alonso si ay uga dhigaan tababarahooda cusub, iyadoo wada-hadallada la filayo inay si degdeg ah u socdaan kadib final-ka FA Cup-ka.
Calum McFarlane ayaa hoggaamin doona Chelsea marka ay Wembley ku wajahaan Manchester City Sabtida kulan muhiim ah oo badbaadin kara ama qurxin kara xilli ciyaareedkooda.
BlueCo ayaa xilli ciyaareedkan shaqada ka eriday labada tababare ee Enzo Maresca iyo Liam Rosenior, waxaana hadda Alonso loo diyaarinayaa inuu qabto shaqada Stamford Bridge. Waxa uu ka horreeyaa musharrixiinta kale sida Andoni Iraola ee Bournemouth, Marco Silva ee Fulham, Oliver Glasner ee Crystal Palace iyo tababarihii hore ee Flamengo, Filipe Luís.
Sida uu sheegay wargeyska The Guardian, ciyaartoyda Chelsea — kuwaas oo aan ku qanacsanayn Rosenior isla markaana dadaal ugu jiray in shaqada laga eryo — waxay rumeysan yihiin in Alonso yahay musharraxa ugu habboon ee kooxda dib ugu soo celin kara wadadii saxda ahayd.
Alonso ayaa bishii Janaayo laga eryay Real Madrid, balse xaaladaha adag ee kooxdaasi tan iyo markaas ka dhacay ayaa muujiyay sida shaqada Bernabeu ay u adag tahay. Sumcaddii uu ku dhistay ku guuleysiga Bundesliga-da isaga oo la jooga Bayer Leverkusen wali way sii xooggan tahay.
Warbixinta ayaa sheegtay in Chelsea ay “la socotay horumarka Alonso tan iyo bilowgii xirfaddiisa tababarenimo”, isla markaana wada-hadallada lala leeyahay wakiilladiisa ay si wanaagsan u socdaan. Waxaa sidoo kale la sheegay in xaaladdu si weyn u dedejin doonto marka uu dhammaado final-ka FA Cup-ka.
Chelsea oo aqbashay dalab muhiim ah oo Alonso dalbaday
Isbeddelka joogtada ah ee tababarayaasha Stamford Bridge kama uusan niyad jebin Alonso inuu kooxda ku biiro, laakiin waxa uu doonayaa “dammaanad qaadyo dhinacyo gaar ah ah”, gaar ahaan inuu saameyn ku yeesho saxiixyada ciyaartoyda cusub.
BlueCo oo horey u lahayd nidaam tababaruhu kaliya kooxda maamulo halka agaasimayaasha ciyaaraha Paul Winstanley iyo Laurence Stewart ay go’aamiyaan saxiixyada, ayaa hadda u muuqata inay beddelayso mowqifkeeda.
Waxaa jira faham ah in shaqsi sumcad weyn leh sida Alonso ay tahay in la dhageysto marka ay timaaddo arrimaha saxiixyada, Chelsea-na aysan doonayn inay ciyaartoy ku khasabto isaga.
Be the first to comment