Liverpool ayaa xilli ciyaareedka cusub ku bilowday waayo cusub, iyadoo Andoni Iraola uu beddelay Arne Slot. Liverpool ayaa shantii kulan ee ugu horreeyay Premier League-ga aan laga badin, iyadoo haysata 2 guul iyo 3 barbaro, Kulankii ugu dambeeyay, Liverpool ayaa 1-0 ku garaacday Bournemouth, waxaana goolka dhaliyay Alexander Isak.
Si kastaba, halyeeyga Liverpool ee Jamie Carragher ayaa si gaar ah u amaanay daafaca da’da yar ee Faransiiska Jeremy Jacquet, kaas oo xagaagii Rennes kaga soo biiray kooxda, Carragher ayaa amaanay Jacquet kadib markii uu sameeyay badbaadin muhiim ah qeybtii labaad, wuxuuna sheegay inuu si weyn ula dhacay qaab ciyaareedkiisa, Carragher ayaa haddana raalli-gelin ka bixiyay daawadayaasha, isagoo sheegay inuu laga yaabo inuu xoogaa ku xadgudbay ammaanta ciyaaryahanka.
Wuxuu carrabka ku adkeeyay in Jacquet uu yahay daafac da’yar oo mustaqbalka khaladaad samayn kara, balse uu hadda si fiican u ciyaarayo isla markaana uu leeyahay muuqaalka iyo astaamaha daafac dhexe oo wanaagsan, Virgil van Dijk ayaa sidoo kale amaanay Jacquet, isagoo sheegay inuu xilli ciyaareedkan muujiyay waxyaabo badan oo wanaagsan. Jacquet isaguna wuxuu sheegay inuu farxad weyn ku qabo inuu la ciyaaro Van Dijk, isla markaana uu wax badan ka baranayo.
Dhanka kale, Carragher wuxuu dhaliil adag u jeediyay Florian Wirtz, isagoo sheegay in kulankii Bournemouth uu ahaa mid ka mid ah kulamadii ugu liitay ee uu Wirtz u ciyaaray Liverpool, Carragher wuxuu sheegay in Wirtz uusan weli muujin heerkii laga filayay tan iyo markii uu Bayer Leverkusen uga soo biiray Liverpool, isagoo sidoo kale su’aal geliyay haddii dhibaatadu tahay qaab ciyaareed xumo ku-meel-gaar ah iyo haddii ay tahay heerka dhabta ah ee ciyaaryahanka.
Wuxuu sheegay in Wirtz uu ku dhibtoonayo inuu saameyn ku yeesho ciyaaraha, gaar ahaan inuu dhaawac ama khatar joogto ah ku abuuro kooxaha kasoo horjeeda, Carragher ayaa sidoo kale xusay in Liverpool ay Wirtz ku bixisay £116 milyan, iyadoo laga filayay inuu kooxda ka caawiyo ku guuleysiga Premier League iyo Champions League, wuxuuna sheegay in farqiga u dhexeeya waxa laga filayay iyo waxa uu hadda soo bandhigayo uu yahay mid weyn.
Be the first to comment