Manchester United ayaa xilli ciyaareedka si adag ku bilaabatay, iyadoo tababare Michael Carrick lagu dhaliilayo go’aanno dhowr ah oo uu qaatay. Warbixintan, oo uu qoray Samuel Luckhurst oo ah wariyaha Manchester United, ayaa tilmaamaysa 10 arrimood oo loo arko inay Carrick dhibaato ku keeni karaan.
1. Ayden Heaven oo uu kusoo bilaabay Hull
Carrick ayaa daafaca dhexe kusoo bilaabay Ayden Heaven kulankii Hull, inkastoo uu ahaa 19 jir aan weli khibrad badan u lahayn Premier League.
Heaven wuxuu ciyaaray dhammaan lixdii kulan ee saaxiibtinnimo ee pre-season-ka, waxaana Carrick u doortay inuu bilaabo iyadoo Lisandro Martínez uu maqnaa. Laakiin warbixintu waxay ku tilmaantay in Heaven loo diro inuu la dagaallamo Oli McBurnie ay ahayd go’aan khaldan.
2. Patrick Dorgu oo garabka bidix lagU bilaabay
Carrick ayaa Hull kusoo bilaabay Patrick Dorgu garabka bidix, inkastoo kooxda ay haysato saddex ciyaaryahan oo booskaas ku ciyaari kara.
Dorgu wuxuu ciyaarta ku jiray 45 daqiiqo oo keliya, waxaana la beddelay qeybtii dambe.
3. Matheus Cunha oo weeraryahan dhexe laga dhigay
Mid ka mid ah go’aannada ugu waaweyn ee lagu dhaliilay Carrick ayaa ah inuu Matheus Cunha ka ciyaarsiiyay weeraryahanka dhexe.
Warbixintu waxay tilmaamaysaa in Cunha uu xilli ciyaareedkii hore Carrick kula ciyaaray garabka bidix, halka Bryan Mbeumo uu si fiican uga ciyaarayay booska weeraryahanka dhexe.
Kulankii Fulham, Cunha ayaa ugu dambeyn dhaliyay goolka barbaraha, waxaana uu kubadda ka helay meel u dhow garabka bidix—booska uu hore ugu fiicnaa.
4. Marcus Rashford oo laga saaray kulankii Everton
Carrick ayaa kulankii Everton beddelay Marcus Rashford, iyadoo Manchester United ay 1-0 ku hoggaamineysay.
Carrick wuxuu sheegay in Rashford uu dareemay wax dhib ah. Hase yeeshee, warbixintu waxay ku doodaysaa in beddelka Rashford iyo in Dorgu lagu soo geliyo ay hoos u dhigtay hanjabaaddii weerarka United.
Waxaa kale oo lagu sheegay in haddii Rashford khasab ku ahaa inuu baxo, Benjamin Šeško lagu beddeli karay, halka Cunha loo wareejin karay garabka bidix.
5. Luke Shaw oo la beddelay Everton
Kadib markii Everton ay 1-1 ka dhigtay ciyaarta, Carrick wuxuu beddelay Luke Shaw xilli lagu jiray waqtigii dheeriga ahaa.
Shaw ayaa dhowr daqiiqo ka hor caawiyay weerarka, isagoo sameeyay orod dhinaca bidix ah oo ugu dambeyn horseeday goolkii Šeško.
Warbixintu waxay sheegaysaa in isbeddelladii daafaca ay saameyn ku yeesheen qaabka United u difaacaysay weerarka Everton, taasoo ugu dambeyn keentay goolkii Ainsley Maitland-Niles ee daqiiqaddii 95-aad.
6. Šeško oo bench ga lagu halmaamay kulankii Manchester City
Markii Phil Foden kaarka cas qaatay daqiiqaddii 23-aad, United waxay heshay fursad ay 10 ciyaaryahan kaga hortagto City.
Šeško wuxuu bilaabay inuu kululeysto qeybtii labaad, taageerayaasha Stretford End-na waxay bilaabeen inay magaciisa ku dhawaaqaan.
Hase yeeshee, Carrick wuxuu ciyaaryahanka kusoo geliyay kaliya 19 daqiiqo kadib, waqtigaas oo Erling Haaland uu hore u dhaliyay goolka kaliya ee ciyaarta.
7. Bruno Fernandes oo dib loogu celiyay khadka dhexe
Markii Šeško la keenay kulankii City, Bruno Fernandes ayaa dib loogu celiyay khadka dhexe.
Warbixintu waxay ku doodaysaa in tani ay Fernandes ka fogeysay goolka City xilli United ay u baahnayd weerar dheeraad ah.
Fursaddii ugu cad-cad ee United waxay timid daqiiqaddii 95-aad, markaas oo Fernandes uu kubad u dhigay Bryan Mbeumo.
8. Isbeddello badan oo lagu sameeyay kooxda kulankii Brighton
Carrick ayaa kulankii Brighton sameeyay sideed isbeddel, arrintaas oo warbixintu si weyn u dhaliilay.
Waxaa sidoo kale kursiga keydka lagu daray ciyaaryahan 15 jir ah.
Leny Yoro iyo Ayden Heaven ayaa kusoo bilowday iyadoo goolhaye Karl Darlow uu kulankiisii ugu horreeyay ciyaarayay. Warbixintu waxay sheegaysaa in saddexdaas ciyaaryahan lagu eedeeyay qayb ka mid ah saddexdii gool ee Brighton.
Brighton ayaa noqotay kooxdii ugu horreysay tan iyo Tottenham 1976 ee Old Trafford ku guuleysata iyadoo markii hore 2-0 lagu hoggaaminayay.
9. Joshua Zirkzee oo marar badan badal loo isticmaalo
Carrick ayaa marar badan kusoo celiyay Joshua Zirkzee isagoo beddel ah.
Warbixintu waxay xustay in Zirkzee uu tan iyo labadii gool ee uu dhaliyay December 2024 uu Premier League u dhaliyay kaliya laba gool oo kale.
United waxay xagaagii diyaar u ahayd inay iibiso, Everton-na waxay muujisay xiiso maalintii ugu dambeysay suuqa kala iibsiga, balse United waxay go’aansatay inay sii haysato.
Zirkzee wuxuu kasoo muuqday saddexdii kulan ee ugu dambeeyay, iyadoo United ay mid kasta oo ka mid ah kulamadaas dhib ku qabtay.
10. Isla shaxdii oo lagu celiyay kulankii Fulham
Carrick ayaa isla XI-da kusoo bilaabay saddex kulan oo xiriir ah oo ay la ciyaareen Ipswich, Everton iyo Fulham.
United waxay Ipswich ka badisay 5-2, Everton waxay la gashay barbaro, halka Fulham ay 1-1 ku dhammaatay.
Warbixintu waxay si gaar ah u xustay afarta daafac ee Diogo Dalot, Harry Maguire, Lisandro Martínez iyo Luke Shaw.
Afartaas ciyaaryahan ayaa sidoo kale ku jiray daaficii United ee laga dhaliyay 4-0 kulankii Brentford ee 2022.
Saddexdii kulan ee Ipswich, Everton iyo Fulham, United waxay afartaas daafac la gashay shan gool, iyadoo warbixintu sheegtay in tiradu xitaa ka badan kari lahayd.
Xaaladda Carrick
Warbixintu waxay soo bandhigtay in Manchester United ay xilli ciyaareedka ku bilaabatay natiijooyin aan joogto ahayn, iyadoo laba guul oo keliya laga helay toddobo kulan. Dhaleeceynta Carrick waxay si gaar ah ugu wajahan tahay xulashada ciyaartoyda, waqtiga beddelka ciyaartoyda iyo qaabka uu u adeegsanayo weeraryahannada sida Cunha, Mbeumo iyo Šeško.
Kulankii ugu dambeeyay ee Fulham, United waxay heshay barbaro 1-1 ah, iyadoo Cunha uu dhaliyay goolkii dambe ee ciyaarta, halka Lisandro Martínez uu dhaliyay gool iska dhalis ah.
Be the first to comment