Ka tegitaankii xiddiga reer Masar Mohamed Salah ee kooxda Liverpool ayaa ka tagay boos weyn oo bannaan ka hor bilaabashada xilli ciyaareedka 2026/2027.
Salah ayaa kooxda ka tagay dhammaadka xilli ciyaareedkii hore, inkastoo uu qandaraaskiisa uga haray hal sano, waxaana weli aan si rasmi ah loo shaacin kooxda uu ku biiri doono.
Xilli ciyaareedkii ugu dambeeyay, Salah wuxuu dhaliyay 12 gool halka uu bixiyay 10 caawin, waana tiro ka hooseysa heerarkiisii caadiga ahaa ee Liverpool.
Liverpool oo heshay beddelka Salah
Sida ay qortay warbaahinta Football Insider, tababaraha cusub ee Liverpool Andoni Iraola ayaa go’aansaday inuusan suuqa ka raadin garabka midig, maadaama uu kalsooni buuxda siiyay da’yarka hibada leh Rio Ngumoha.
Ngumoha oo jira 17 sano ayaa dhaliyay goolka keliya ee Liverpool kulankii ay la ciyaareen Wrexham, isagoo ciyaarta kusoo galay beddel, kana soo weeraray garabka midig.
Iraola oo rumeysan kartida Ngumoha
Tababare Iraola ayaa aaminsan in Ngumoha uu leeyahay awood uu ku buuxin karo booskii uu baneeyay Mohamed Salah.
Intii uu joogay tababarihii hore Arne Slot, Ngumoha fursado badan ma helin, balse hadda wuxuu caddeeyay inuu mudan yahay kalsoonida kooxda.
Dhanka kale, Federico Chiesa ayaa ah garabka midig ee keliya ee khibradda leh ee hadda ku jira safka Liverpool, halka kooxda ay hore ula soo wareegtay Víctor Muñoz, isla markaana lala xiriirinayay xiddiga Bradley Barcola ee Paris Saint-Germain.
Caqabadda hortaalla Ngumoha
Rio Ngumoha wuxuu wajahayaa shaqo adag haddii uu doonayo inuu gaaro heerkii Mohamed Salah, maadaama Salah xilli ciyaareedkiisii ugu horreeyay ee Liverpool uu dhaliyay 44 gool isla markaana uu sameeyay 14 caawin, taasoo ka dhigtay mid ka mid ah xilli ciyaareedyadii ugu fiicnaa taariikhda kooxda.
Hadda, dhammaan indhaha taageerayaasha Liverpool ayaa ku wajahan Rio Ngumoha si loo arko inuu dhab ahaan noqon karo beddelka xiddigii weynaa ee Mohamed Salah.
Be the first to comment