Chelsea ayaa bixisay in ka badan 100 milyan oo Yuuro si ay ula soo saxiixato Morgan Rogers, arrintaasina waxay noqotay mid si weyn looga hadal hayo.
Dhammaanteen waan ognahay inuu yahay ciyaaryahan wanaagsan, balse ma u qalmaa lacag intaas le’eg? Maxay Chelsea lacagtaas ugu bixisay ciyaaryahan lambarka 10-aad ka ciyaara iyadoo ay horay u haysatay Cole Palmer? Su’aalahan ayaan qormadan kaga jawaabi doonaa, annagoo sharxeyna sababta Chelsea ay ugu bixisay Morgan Rogers ku dhowaad 150 milyan oo Yuuro.
Marka hore, waa in la fahmaa in suuqa kala iibsiga maanta uu aad qaali u yahay, Elliot Anderson waxaa lagu iibsaday 135 milyan oo Yuuro, Sandro Tonali 108 milyan, halka Mateus Fernandes uu ku kacay 100 milyan, Dhammaantood waa khad dhexe, mana jirto caddeyn ay kaga fiican yihiin Rogers, gaar ahaan marka la eego goolasha iyo caawinta uu sameeyo. Sidaas darteed Aston Villa waxay dalbatay lacag badan si ay u fasaxdo ciyaaryahankeeda ugu fiican.
Laakiin su’aasha ugu weyn ayaa ah: Chelsea ma u baahnayd Rogers? Iyadoo ay horay u haysato mid ka mid ah lambarrada 10-aad ee ugu fiican dunida, Cole Palmer, maxay haddana u soo iibsatay mid kale?
Jawaabtu waxay tahay in Chelsea ay leedahay tababare cusub oo ah Xabi Alonso. Alonso wuxuu caan ku yahay nidaam uu ku ciyaarsiiyo laba ciyaaryahan oo lambarka 10-aad ah. Wuxuu isticmaali karaa qaab ciyaareed 3-4-2-1 ama 3-4-3, halkaas oo Palmer iyo Rogers ay wada ciyaari karaan gadaasha weeraryahanka. Labaduba waxay leeyihiin lugo kala duwan oo ay ku fiican yihiin, taasoo weerarka ka dhigaysa mid dheellitiran.
Waxaa kaloo suuragal ah inuu beddelo qaabka weerarka, isagoo hal lambarka 10-aad ka dambeeya laba weeraryahan dhigaya. Xaaladdaas Rogers wuxuu weerarka kula safan karaa João Pedro, halka Palmer uu noqdo lambarka 10-aad ee keliya.
Rogers hore ayuu u soo ciyaaray booska False 9, wuxuuna ku fiicnaa. Alonso-na hore ayuu Bayer Leverkusen uga isticmaalay Alejandro Grimaldo booskaas, xitaa finalkii Europa League, sidaas darteed Rogers wuxuu siinayaa fursado badan oo xeeladeed.
Waxaa kale oo jira calaamado muujinaya in Chelsea qorsheyneyso inay iibiso Nicolas Jackson, taasoo suuragal ka dhigaysa in Alonso uu Rogers u arko weeraryahan labaad.
Rogers sidoo kale wuxuu ka ciyaari karaa garbaha. Kooxda England ayuu garabka midig uga ciyaaray kulankii nus-dhamaadka Koobka Adduunka ee Argentina, isagoo sameeyay caawin. Xilli ciyaareedkii 2025–26 wuxuu inta badan ka ciyaaray garabka bidix ee Aston Villa, isagoo 17 kulan ka sameeyay 9 gool iyo caawin.
Waxa uu ka ciyaari karaa:
- Lambarka 10-aad
- Garabka bidix
- Garabka midig
- Weeraryahan labaad
- Weeraryahan dhexe
- Khadka dhexe
- Garabka bidix ee khadka dhexe
Taasi waxay ka dhigaysaa ciyaaryahan meel kasta laga adeegsan karo.
Haddii Chelsea ay iibiso Garnacho, isla markaana Jamie Gittens uusan noqon ciyaaryahan joogto ah xilli ciyaareedka cusub, Alonso wuxuu Rogers si weyn ugu adeegsan karaa garbaha.
Heshiiskan ma aha mid lagu beddelayo Cole Palmer. Labadooduba si fiican ayay u wada ciyaari karaan. Waxaa intaa dheer inay yihiin saaxiibo dhow tan iyo markii ay wada joogeen akadeemiyadda Manchester City. Isfahamkooda ayaa Chelsea faa’iido weyn u noqon kara.
Marka la eego tirooyinka, Rogers wuxuu lahaa xilli ciyaareed cajiib ah. Wuxuu Aston Villa u dhaliyay 14 gool, wuxuuna sameeyay 11 caawin, isagoo noqday mid ka mid ah laba ciyaaryahan oo Ingiriis ah oo Premier League ka sameeyay laba-lambar goolal iyo caawin hal xilli ciyaareed.
Wuxuu sidoo kale ka mid ahaa 10-ka ciyaaryahan ee ugu fursadaha badan u sameeyay saaxiibbadiis Premier League, isagoo isla markaana goolal badan dhaliyay.
Mid ka mid ah awoodihiisa ugu waaweyn waa inuu kubadda kasoo qaado qeybtiisa garoonka isagoo xoog iyo xirfad ku gaarsiiya aagga weerarka. Taasi waxay ka dhigeysaa xiriir muhiim ah oo u dhexeeya khadka dhexe iyo weerarka.
Dhanka jir ahaan, Rogers aad ayuu uga xoog badan yahay Palmer. Taageerayaal badan ayaa sheegaya in Palmer mararka qaar si fudud kubadda looga qaado, laakiin Rogers waa ciyaaryahan awood badan oo aan ka cabsanayn loollanka.
Intii uu Thomas Tuchel ahaa tababaraha England, Rogers wuxuu ahaa khadka dhexe ee saddexaad ee ugu badan kubadaha dib u soo ceshada, waxaana ka horreeyay oo keliya Elliot Anderson iyo Declan Rice.
Marka aad hesho ciyaaryahan:
- Goolal dhaliya,
- Caawin sameeya,
- Fursado abuura,
- Kubadda horay u qaada,
- Isla markaana difaacana wax ku biiriya,
waa ciyaaryahan ay kooxuhu diyaar u yihiin inay lacag badan ku bixiyaan.
Waxaa kale oo uu yahay ciyaaryahan kulamada waaweyn ka muuqda. Labadii xilli ciyaareed ee ugu dambeeyay wuxuu:
- 4 gool ka dhaliyay Tottenham.
- 2 gool ka dhaliyay Manchester United.
- Wuxuu sidoo kale goolal ka dhaliyay Liverpool, Manchester City iyo PSG.
Finalkii Europa League wuxuu dhaliyay hal gool, wuxuuna bixiyay hal caawin, isagoo Aston Villa ku hoggaamiyay koobkoodii ugu horreeyay ee Europa League iyo koob weyn oo ugu horreeyay muddo 30 sano ah.
Goolkiisii finalka wuxuu ka dhigay Ingiriiskii ugu da’da yaraa ee gool ka dhaliya final weyn oo Yurub ah muddo 25 sano ah, halka caawintiisuna ka dhigtay ciyaaryahankii Ingiriiska ee ugu caawinta badnaa hal xilli ciyaareed Europa League.
Wuxuu sidoo kale noqday Ingiriiskii ugu horreeyay muddo 27 sano ah ee hal final oo Yurub ah gool dhaliya isla markaana caawin sameeya.
Waxaa intaas dheer inuu hore u hantiyay abaalmarino ay ka mid yihiin:
- Gooldhaliyihii ugu sarreeyay ee EFL Cup 2024.
- Abaalmarinta PFA Young Player of the Year 2025.
- Ciyaaryahankii ugu fiicnaa Europa League 2026.
Isagoo jira 23 sano oo keliya, wuxuu leeyahay rikoor wanaagsan, waxaana la filayaa inuu sii horumaro marka uu ku biiro koox weyn sida Chelsea.
Da’diisu sidoo kale waxay si buuxda ula jaanqaadaysaa siyaasadda Chelsea ee ah inay la soo saxiixato ciyaartoy da’yar oo mustaqbal leh.
Waxaa kale oo la sheegay in Arsenal ay si weyn u doonaysay Rogers, balse kadib wada hadal uu la yeeshay Xabi Alonso ayuu doortay mashruuca Chelsea halkii uu ka aadi lahaa kooxda haysata horyaalka Premier League. Arrintaas ayaa la rumeysan yahay inay Chelsea ku dhiirrigelisay inay si degdeg ah u dhammaystirto heshiiska.
Ugu dambeyn, ha
Be the first to comment