Tababaraha Kooxda Arsenal ee Mikel Arteta ayaa sheegay in ay kooxda chelsea u qalanto in ay Arsenal kula tartanto premier League xilli ciyaareedkan.
Arsenal oo hogaamineysa horyaalka ayaa lix dhibcood kaga horreysa Chelsea oo ku jirta kaalinta labaad ka hor derbiga London ee Axadda ka dhici doona Stamford Bridge.
Inkasta oo Arsenal ay dhammaysatay kaalinta labaad saddex xilli oo xiriir ah, haddana Chelsea waxay awoodeen oo keliya inay galaan kaalinta afraad xilli ciyaareedkii hore.
Laakiin kooxda Enzo Maresca ayaa ku guuleysatay Club World Cup xagaagii waxayna sameeyeen suuqa kala iibsiga oo miro dhal ah si ay u xoojiyaan kooxda.
Chelsea waxay la kulantay hoos-u-dhac bilowgii xilli ciyaareedka, balse shan guul oo ay ka gaareen lixdii ciyaarood ee ugu dambeysay ayaa sababtay in Blues ay soo gasho kaalinta 2-aad ee kala saraynta premier League.
Isagoo ka hadlayay derbiga weyn ee ay la leeyihiin Arsenal, Maresca wuxuu sheegay inay weli tahay goor hore in lagu dhawaaqo in kooxdiisa Chelsea ay u tartamayso horyaalka.
Laakiin Arteta wuxuu aaminsan yahay in Chelsea ay u qalanto in ay ku tartanto premier League xilli ciyaareedkan.
Markii la weydiiyay inuu u arko Chelsea inay yihiin kuwa u tartamaya horyaalka, Arteta wuxuu yiri: “Waxaan u maleynayaa inaan dhammaanteen halkaa joogno, iyaguna way joogaan maxaa yeelay si buuxda bay u mudan yihiin wixii ay qabteen sanadihii ugu dambeeyay.
“Waxaan u maleynayaa in kooxda ay dhiseen, tirada ciyaartoyda ay hayaan, tayada ay leeyihiin, iyo tirada tababarayaasha ay hayaan—waxaas oo dhan waxay ka dhigayaan waxa halkaas ka dhacaya mid aad u wanaagsan, waana u qalmaan inay halkaas joogaan.”
Be the first to comment