Halyeeyga Manchester United, Wayne Rooney, ayaa magacaabay saddex ciyaartoy oo ka tirsan kooxda Red Devils kuwaas oo ka faa’iideysanaya saameynta weeraryahanka Benjamin Sesko uu ku leeyahay kooxda.
Rooney ayaa hadalkan sheegay isagoo amaanaya Sesko kadib guushii 2-0 ee ay Manchester United ka gaartay Sunderland toddobaadkii hore kulan ka tirsan Premier League.
Sida uu sheegay weeraryahankii hore ee xulka England, ciyaaryahanka 22-jirka ah ayaa ka dhigaya ciyaarta mid sahlan ciyaartoyda sida Mason Mount, Bryan Mbeumo, iyo Matheus Cunha, iyadoo ay ugu wacan tahay joogitaankiisa weerarka hore.
“Waxaan u maleynayaa in [Sesko] uu yahay ciyaaryahan adag in la wajahdo, wuxuuna si fiican u adeegsadaa jirkiisa, wuxuuna si xoogan ugu tartamaa kubbadaha,” ayuu yiri Rooney isagoo ka hadlayay barnaamijkiisa The Wayne Rooney Show.
“Wuxuu ciyaarta u fududeeyaa Mbeumo, Cunha marka uu garoonka joogo, ama Mount, si ay orod ugu sameeyaan gadaashiisa, markaa waxaan aaminsanahay in ay si cad uga shaqeeyeen arrintaas.”
Be the first to comment