Tababaraha kooxda Chelsea, Enzo Maresca, ayaa la filayaa inuu sameeyo isbeddello waaweyn oo ku saabsan kooxdiisa marka ay la ciyaarayaan kooxda Sunderland.
Blues ayaa 5-1 ku garaacday kooxda Ajax tartanka Champions League Arbacadii habeenkii, iyadoo Maresca uu beddelay 10 ciyaaryahan oo ka mid ahaa kuwii ku bilaabmay kulankii ay 3-0 kaga badiyeen Nottingham Forest usbuucii hore, waxaana kaliya booskiisa ku sii sugnaa khadka dhexe ee Romeo Lavia.
Tababaraha reer Talyaani ayaa haatan dib ugu laaban kara isla kooxdaas oo kale ee soo bandhigtay ciyaar xooggan qeybtii labaad ee kulankii ka dhacay garoonka City Ground, taasoo keentay in si degdeg ah loo soo afjaro waqtigii gaabnaa ee Ange Postecoglou ee kooxda Forest.
Maresca ayaa shirkiisa jaraa’id ee ka hor kulanka Sunderland qabtay subaxnimadii Jimcaha, wuxuuna sheegay in Chelsea aysan qabin wax dhaawacyo cusub ah oo ay la tacaalayaan.
Levi Colwill, Cole Palmer, Benoit Badiashile iyo Dario Essugo ayaa weli dhaawacyo kaga maqan kooxda, balse Liam Delap ayaa haatan dib ugu soo laabtay tababarka kaddib dhaawac muruqa bowdada ah waxaana suuragal ah inuu diyaar u noqdo kulanka ay Chelsea la ciyaarayso Wolves wareegga 16-aad ee Carabao Cup-ka Arbacada.
Waxaa la filayaa in Joao Pedro uu dib ugu soo laabto safka koowaad kulanka ka dhanka ah Sunderland, kaddib markii uu ganaax kaga maqnaa kulankii Champions League ee Ajax, hase yeeshee waxaa laga yaabaa inuu ciyaaro booska lambarka 10-aad isagoo ka dambeeya Marc Guiu.
Shaxda ay Chelsea kaga hor iman karto kulanka Sunderland:
Sanchez; James, Tosin, Chalobah, Cucurella; Caicedo, Fernandez; Estevao, Joao Pedro, Neto; Guiu
Be the first to comment