Jose Mourinho ayaa dhaleeceyn u jeediyay Manchester United kaddib markii ay u magacaabeen Michael Carrick tababarahooda ku-meel-gaarka ah.
Carrick, oo 44 jir ah, ayaa shaqada loo dhiibay si ku-meel-gaar ah kaddib markii Red Devils ay xilka ka qaadeen Ruben Amorim horraantii bishan.
Khibraddiisa tababarnimo ee keliya ee hore waxay ahayd Middlesbrough, halkaas oo uu joogay wax ka yar saddex sano, isla markaana uu gaaray play-offs-ka Championship-ka xilli-ciyaareedkiisii ugu horreeyay.
Carrick sidoo kale wuxuu ahaa kaaliye tababare oo ka tirsanaa Manchester United intii ay xilka hayeen Jose Mourinho iyo Ole Gunnar Solskjaer.
Kaddib markii uu kabaha ciyaarta iska bixiyay xagaagii 2018, ciyaaryahankii hore ee khadka dhexe ayaa lagu soo dhaweeyay inuu ku biiro Jose Mourinho shaqaalihiisa tababareyaasha.
Labadooduba waxay wada shaqeeyeen muddo lix bilood ah, ka hor inta aan Mourinho xilka laga qaadin.
Inkasta oo uu xiriir dhow la leeyahay Carrick, tababaraha hadda ee Benfica ayaa qirtay inuu la yaabay go’aanka Manchester United ay u magacawday.
Mourinho wuxuu ku dooday in shaqooyinka ugu waaweyn uguna sumcadda badan ay tahay in la siiyo tababarayaal khibrad badan leh.
Kaddib markii Benfica ay 2–0 ku guuldarreysatay kulan ay marti ku ahayd Juventus Champions League Arbacadii, tababaraha 62 jirka ah ayaa yiri:
“Aniga ahaan, waa wax la yaab leh marka tababarayaal aan lahayn taariikh iyo shaqo muuqata ay helaan fursad ay ku tababaraan kooxaha ugu waaweyn uguna muhiimsan adduunka; taasi waa yaabka dhabta ah.”
“Marka [AC] Milan ay qaadato [Max] Allegri, marka Juventus ay qaadato [Luciano] Spalletti, ama marka Roma ay doorato [Gian Piero] Gasperini, arrimahaas marnaba lama yaabo.”
Be the first to comment