Chelsea Oo Warbixin Ka Soo Saartay Shaqo Ka Tagista Enzo Maresca.

Enzo Maresca ayaa si degdeg ah uga tagay xilkii tababaraha Chelsea.

Maresca wuxuu xilka ka qabtay Stamford Bridge bishii June 2024, waxaana qandaraaskiisa uu kula jiray Blues uu socon lahaa ilaa 2029.

Tababaraha Talyaaniga ah ayaa Chelsea ku hoggaamiyay hanashada koobka Conference League xilli ciyaareedkii hore, halka Chelsea ay sidoo kale ku guuleysatay Koobka Adduunka ee Naadiyada xagaagii iyadoo uu Maresca hoggaaminayo.

Chelsea waxay si fiican ku bilaabatay xilli ciyaareedkan, balse waxay ku guuleysatay kaliya hal kulan toddobadii kulan ee ugu dambeeyay ee horyaalka, taasoo sababtay inay 15 dhibcood ka dambeeyaan hoggaamiyeyaasha Premier League ee Arsenal.

Waxaa sidoo kale jiray xiisad ka taagan heerka maamulka kadib markii Maresca uu sheegay in “dad badan” ay sababeen “48-kii saacadood ee ugu xumaa” tan iyo markii uu ku biiray kooxda, kaddib markii Chelsea ay bishii hore ka adkaatay Everton.

Maresca ayaa sidoo kale lala xiriiriyay kooxo ay ku xifaaltamaan Premier League, gaar ahaan Manchester City, isagoo loo arko beddelka Pep Guardiola, oo uu hore uga soo caawiyay Etihad Stadium.

Arrin la yaab leh ayaa ah in Man City ay tahay kooxda xigta ee Chelsea la ciyaari doonto, balse weli lama oga cidda fariisan doonta kursiga tababarenimo ee Blues Axadda kadib bixitaanka Maresca.

War-saxaafadeed ay soo saartay kooxda Premier League ayaa lagu yiri:

“Chelsea Football Club iyo Tababaraha Guud Enzo Maresca ayaa si rasmi ah u kala tagay.

‘Intii uu joogay kooxda, Enzo wuxuu hoggaamiyay kooxda guulo waaweyn, isagoo ku hoggaamiyay hanashada UEFA Conference League iyo FIFA Club World Cup”

“Guulahaas waxay sii ahaan doonaan qayb muhiim ah oo ka mid ah taariikhda dhow ee kooxda, waxaana uga mahadcelineynaa waxqabadkiisa iyo doorkii uu ku lahaa kooxda.”