Halyeeyga Manchester United iyo xulka England, Wayne Rooney, ayaa digniin ku saabsan hanashada horyaalka Premier League u diray Arsenal iyo Manchester City.
Wuxuu uga digay in labada kooxood ee ku jira kaalmaha koowaad iyo labaad ee jadwalka horyaalka ay si dhow uga feejignaadaan Liverpool oo gadaal ka soo daba socota.
Xilli-ciyaareedkii 2024–25 waxaa ku guuleysatay Liverpool, halka Arsenal ay gashay kaalinta labaad, Manchester City-na ay noqotay saddexaad.
Laakiin hadda, Arsenal waxay laba dhibcood ka horreysaa Manchester City marka la galayo xilliga Kirismaska, halka Liverpool ay u muuqato inay mar kale heshay qaab-ciyaareedkoodii wanaagsan.
Kooxda uu hoggaamiyo Arne Slot ayaa hadda ah lix kulan oo xiriir ah aan laga badin tan iyo markii ay guuldaro 4–1 kala kulantay PSV tartanka Champions League, waxayna haatan ku jirtaa kaalinta shanaad ee jadwalka horyaalka.
Rooney weli wuxuu rumeysan yahay in Reds-ku ay awood u leeyihiin inay gadaal ka soo koraan oo ay ugu dambeyn hanan karaan horyaalka.
“Liverpool sidoo kale, haddii ay helaan taxane guulo ah oo ay badiyaan dhowr kulan, marna tartanka lagama saari karo. Haddii ay helaan taageerada ka dambeysa, way saameyn karaan horyaalka.
“kama saari kartid tartanka. Laakiin Arsenal iyo City waa labada kooxood ee aan u maleynayo inay kala durki doonaan. Aston Villa si cajiib ah ayay u ciyaareen”
Rooney, oo hore uga tirsanaa xulka England, ayaa shan jeer ku guuleystay horyaalka Premier League isagoo la joogay Manchester United.
Be the first to comment