Xulka qaranka Masar ayaa sii adkaynaya maqaamkiisa ah xulka ugu weyn taariikhda Koobka Qaramada Afrika, kadib markii uu sameeyay rikoor gaar ah oo ay ka buuxaan guulo iyo waxqabadyo aanay cid kale ku dhowaan.
Xulka masar waxa uu hoggaaminayaan liiska xulalka ugu badan ee ka qaybgalay tartanka qaaradda, iyagoo kasoo muuqday 26 tartan oo kala duwan, taasoo muujinaysa joogitaan joogto ah iyo xasillooni ay ku leeyihiin masraxa Afrika jiilba jiil.
Xulka Masar ayaa sidoo kale haysta tirada ugu badan ee kulamada la ciyaaray, iyagoo galay 111 kulan, waxayna hoggaaminayaan liiska guulaha iyagoo gaaray 60 guulood, taasoo ka tarjumaysa dabeecadda xul mar walba u dagaallama horyaalnimada.
Dhanka weerarka, Masar ayaa ah xulka ugu goolasha badan taariikhda tartanka, iyagoo dhaliyay 175 gool, taasoo muujinaysa awood weerar oo soo jirtay tobannaan sano.
Hoggaamintu kuma koobna garoonka oo keliya, maadaama Masar ay tahay dalka ugu badan ee martigeliyay Koobka Qaramada Afrika, iyagoo qabanqaabiyay shan jeer, muddadaasna ku qoray taariikh dahab ah.
Fircooniyiintu waxay haystaan tirada ugu badan ee koobabka, iyagoo ku guuleystay 7 horyaal, sidoo kale waxay gaareen finalka 10 jeer, waxayna ku guuleysteen horyaalka 3 jeer intii ay martigelinayeen tartanka.
Guusha ugu weyn ee muuqata ayaa ah in Masar ay tahay xulka kaliya ee ku guuleystay tartanka saddex jeer oo isku xigta, taasoo xaqiijinaysa heerkooda taariikheed ee aan la midka ahayn qaaradda Afrika.
Taageerayaasha kubadda cagta Afrika ayaa si weyn u sugaya bilaabashada tartanka 35aad ee Koobka Qaramada Afrika 2025 ee ka dhici doona Morocco, kaas oo la qorsheeyay inuu socdo laga bilaabo 21-ka December ilaa 18-ka January, iyadoo ay ka qaybgalayaan 24 xul, dhammaantoodna hiigsanaya inay jebiyaan awoodda iyo xukunka Masar.
Be the first to comment