Roberto Firmino ayaa ka hadlay saaxiibtinimadii iyo xiriirkii ciyaareed ee uu la lahaa Mohamed Salah iyo Sadio Mané intii ay saddexdoodu ku wada sugnaayeen Liverpool, Firmino, oo hadda u ciyaara Al Sadd ee Qatar, ayaa sheegay in isaga, Salah iyo Mané ay lahaayeen isfaham gaar ah oo ka caawiyay Liverpool inay gaarto guulo waaweyn.
Wuxuu sheegay in saddexdooda qaab ciyaareedku si fiican isu dhammaystiri jiray, isla markaana ay garoonka si wanaagsan u fahmi jireen meelaha uu mid walba ka doonayay inuu kubadda ka helo, Firmino wuxuu Liverpool ku biiray sanadkii 2015, wuxuuna kooxda joogay ilaa 2023. Intii uu Anfield joogay, wuxuu kula guuleystay toddobo koob, oo ay ugu muhiimsanaayeen Premier League iyo Champions League.
Isagoo ka hadlayay saddexdii weeraryahan ee Liverpool, Firmino wuxuu sheegay in ay awood u lahaayeen inay goolal dhaliyaan, inay fursado abuuraan, isla markaana ay si fiican isu fahmi jireen, waxa kale oo uu tilmaamay in dhammaantood ay mar walba mudnaanta siin jireen danta kooxda.
Qaybta ugu muhiimsan ee hadalkiisa waxay ahayd fariinta uu u diray Mohamed Salah, Firmino wuxuu Salah u rajeeyay nasiib wanaagsan iyo guul, isagoo wajahaya cutub cusub oo xirfaddiisa ah kadib markii uu ku biiray Trabzonspor ee dalka Turkiga.
Wuxuu sheegay in Salah uu Liverpool kula soo guuleystay koobab badan isla markaana uu jabiyay rikoorro badan. Firmino wuxuu xusay in isaga iyo Salah ay wada sameeyeen taariikh, iyagoo Liverpool kula guuleystay dhammaan koobabkii waaweynaa.
Firmino sidoo kale wuxuu si weyn uga hadlay Jürgen Klopp, isagoo sheegay inuu door muhiim ah ku lahaa horumarkiisa, Wuxuu sheegay inuu mararka qaar Klopp kula xiriiro Instagram, isla markaana uu wax badan ku leeyahay tababarahii hore ee Liverpool.
Firmino wuxuu xusuustay in markii uu Liverpool yimid aysan wax walba u fududayn, balse Klopp uu si weyn u aaminsanaa awooddiisa, isaga oo u sheegay muhiimadda uu kooxda u leeyahay, Firmino wuxuu sidoo kale taageeray go’aanka Klopp uu ugu soo laabtay shaqada tababarenimo, isagoo hadda hoggaaminaya xulka qaranka Jarmalka.
Wuxuu aaminsan yahay in Klopp uu yahay tababare awood u leh inuu ciyaartoyda ka soo saaro waxqabadkooda ugu sarreeya, wuxuuna saadaaliyay inuu guul weyn la gaari karo xulka Jarmalka, Roberto Firmino wuxuu sidoo kale ka hadlay mustaqbalkiisa, inkastoo uu bisha October 35 sano jirsan doono, haddana weeraryahanka reer Brazil ma qorsheynayo inuu hadda ka fariisto kubadda cagta.
Wuxuu qirtay in diyaar garowga xilli ciyaareed kasta uu sii adkaanayo marka da’du kororto, laakiin wuxuu sheegay inuu weli dareemayo farxaddii uu kubadda cagta ka heli jiray, Firmino wuxuu xitaa sheegay inuu doonayo inuu ciyaaro afar ama shan sano oo kale, taas oo ka dhigan inuu diyaar u yahay inuu ciyaaraha sii wato ilaa uu gaaro 40 sano.
Ugu dambeyn, Firmino wuxuu sheegay inuu mar uun ku laaban doono Anfield, wuxuu ku tilmaamay garoonka Liverpool meel si gaar ah muhiim ugu ah isaga, wuxuuna sheegay inuu jeclaan lahaa inuu mar kale halkaas ku ciyaaro, gaar ahaan kulan samafal ah oo ay ka qeyb galayaan halyeeyadii Liverpool.
Sidaas darteed, inkastoo Firmino iyo Salah ay hadda ku kala jiraan dalal iyo kooxo kala duwan, hadalladiisa waxay muujinayaan in xiriirkii ka dhaxeeyay saddexdii weeraryahan ee Liverpool uu weli yahay mid xusuus gaar ah ku leh.
Be the first to comment