Tababarihii hore ee Manchester United, Rúben Amorim, ayaa qirtay inuu sameeyay qaladaad intii uu hoggaaminayay kooxda, isagoo sidoo kale raalli-gelin u diray taageerayaasha Manchester United shirkiisii ugu horreeyay ee jaraa’id tan iyo markii loo magacaabay tababaraha cusub ee AC Milan.
Amorim ayaa shaqada laga eryay bishii January kadib 14 bilood oo uu joogay garoonka Old Trafford. Wararka ayaa sheegay in khilaaf uu kala dhexeeyay maamulka Manchester United, gaar ahaan su’aalihii laga qabay nidaamkiisii ciyaareed ee 3-4-3. Ugu dambeyn, kooxda ayaa go’aansatay inay shaqada ka caydhiso maadaama aysan arkin horumar ku filan muddadii uu xilka hayay.
Ka dib bixitaankii Amorim, Michael Carrick ayaa loo magacaabay tababaraha cusub, wuxuuna kooxda ku hoggaamiyay kaalinta saddexaad ee Premier League, taas oo u xaqiijisay inay dib ugu soo laabato UEFA Champions League.
Dhanka kale, Amorim ayaa hadda loo magacaabay tababaraha cusub ee AC Milan. Kooxda Talyaaniga ayaa xilli ciyaareedka soo socda ka qeyb geli doonta UEFA Europa League kadib markii ay kaalinta shanaad ka gashay Serie A xilli ciyaareedkii hore.
Isagoo la hadlayay warbaahinta Talyaaniga, Amorim wuxuu sheegay inuu ka xun yahay inuusan fursad u helin inuu si toos ah ula hadlo taageerayaasha Manchester United markii uu ka tagayay kooxda. Wuxuu yiri: “Waxaan bartay wax badan, qaladaadna waan sameeyay. Waan ka xumahay inaanan helin fursad aan fariin ugu diro taageerayaasha Manchester United. Aad ayaan ugu faanayaa inaan tababare u ahaa muddo hal sano ah.”
Amorim wuxuu intaas ku daray in waayo-aragnimadii Manchester United ay ka dhigtay tababare ka wanaagsan. Wuxuu sheegay inuu isku dayi doono inuu saxo qaladaadkii uu sameeyay, inkastoo uu qiray inay jiraan waxyaabo aan la beddeli karin. Sida uu sheegay, casharrada uu bartay ayaa ka caawin doona inuu guulo ka gaaro shaqadiisa cusub ee AC Milan.
Be the first to comment