Xafladda PFA Awards 2026 oo lagu qabtay Manchester Opera House ayaa isu keentay qaar ka mid ah xiddigaha ugu waaweyn kubadda cagta Ingiriiska, iyadoo Bruno Fernandes iyo Declan Rice ay hoggaaminayeen ciyaartoydii sida weyn looga dareemayay munaasabadda, Bruno Fernandes oo 31 jir ah ayaa xafladda yimid isaga oo ay weheliso xaaskiisa Ana Pinho, waxaana indhaha si gaar ah loogu hayay kabtanka Manchester United, kaas oo loo magacaabay abaal-marinta PFA Men’s Players’ Player of the Year.
Fernandes ayaa xilli ciyaareedkii 2025/26 soo bandhigay qaab ciyaareed heer sare ah. Waxa uu Manchester United ka caawiyay inay Premier League ku dhamaysato kaalinta saddexaad, isagoo sidoo kale sameeyay 21 caawin oo noqotay rikoor cusub oo hal xilli ciyaareed ah oo Premier League ah.
Guushiisa xilli ciyaareedka ayaa sidoo kale keentay inuu horey u qaato laba abaal-marin oo waaweyn, kuwaas oo kala ah Football Writers’ Association Footballer of the Year iyo Premier League Player of the Season, sidaas darteed, abaal-marinta PFA waxay noqotay mid kale oo muhiim u ah xilli ciyaareedkiisa cajiibka ah.
Dhanka kale, Declan Rice ayaa isna ka mid ahaa ciyaartoyda loo tartamayay abaal-marinta PFA Player of the Year, kaddib markii uu door muhiim ah ka qaatay Arsenal oo ku guuleysatay horyaalka Premier League, Rice ayaa xafladda ka soo muuqday isaga oo ay weheliyaan qaar ka mid ah saaxiibbadiis Arsenal, waxaana ka mid ahaa David Raya, Gabriel, Jurriën Timber iyo William Saliba. Xiddiga khadka dhexe ayaa ahaa mid ka mid ah ciyaartoydii laf-dhabarta u ahaa Arsenal xilli ciyaareedkii ay ugu dambeyntii soo afjartay sugitaankii horyaalka.
Rice ayaa sidoo kale sanadkan la sameeyay xulka England, isagoo qeyb ka ahaa kooxdii ku guuleysatay inay kaalinta saddexaad ka gasho Koobkii Adduunka 2026, Xafladda waxaa sidoo kale ka qeyb galay tababaraha xulka England Thomas Tuchel, halka Manchester United ay matalayeen tababare Michael Carrick iyo madaxa fulinta kooxda Omar Berrada.
Musharraxiinta kale ee abaal-marinta ragga waxaa ka mid ahaa Erling Haaland iyo Rayan Cherki oo Manchester City ah, taasoo tartanka ka dhigtay mid ay ku loollamayeen qaar ka mid ah ciyaartoyda ugu muhiimsan Premier League, dhanka haweenka, liiska musharraxiinta waxaa ka mid ahaa Alessia Russo, Lauren James, Jess Park, Bunny Shaw, Yui Hasegawa iyo Kirsty Hanson.
Munaasabadda PFA Awards kuma koobnayn oo keliya ciyaartoyda iyo tababarayaasha, waxaana sidoo kale kasoo muuqday dad caan ka ah dunida madadaalada iyo baraha bulshada, oo ay ka mid yihiin Gemma Owen iyo livestreamer-ka Angry Ginge, guud ahaan, PFA Awards 2026 waxay noqotay habeen ay isugu yimaadeen xiddigaha ugu caansan kubadda cagta England, iyadoo Bruno Fernandes iyo Declan Rice ay ahaayeen labada magac ee ugu weyn ee indhaha lagu hayay, midkoodna uu rajeynayay inuu ku guuleysto mid ka mid ah abaal-marinnada shaqsiga ah ee ugu qiimaha badan xilli ciyaareedka.
Be the first to comment