Xiddiga xulka England iyo Chelsea, Morgan Rogers, ayaa ka hadlay doodda muddada dheer ee ku saabsan Lionel Messi iyo Cristiano Ronaldo, isagoo shaaca ka qaaday in Ronaldo uu ahaa ciyaaryahankii uu isaga shaqsi ahaan ugu jeclaa.
Rogers oo wareysi siiyay website-ka rasmiga ah ee Chelsea ayaa sheegay in inkastoo Ronaldo uu ahaa xiddigga uu taageeri jiray, haddana kulankii uu Messi kaga hor yimid Koobka Adduunka 2026 uu si weyn ula yaabay heerka ciyaareed ee xiddiga reer Argentina:- “Ronaldo wuxuu ahaa ciyaaryahanka aan shaqsi ahaan ugu jeclaa,” ayuu yiri Rogers.
Rogers ayaa intaas ku daray in uu Messi si toos ah ula ciyaaray semi-finalkii Koobka Adduunka 2026, xilli Messi uu jiray 39 sano.
Wuxuu yiri: “Ma rumaysan karin, Xitaa ma qiyaasi karo heerkii uu joogay markii uu ku jiray waqtigiisii ugu fiicnaa. Waxaan qiyaasayaa in xilligaas ay gebi ahaanba adkeyd in la joojiyo, oo ay ahayd wax ka baxsan awoodda aadanaha.”
Rogers ayaa sidoo kale sheegay in inkastoo Messi uu markaas 39 jir ahaa, haddana ay aad u adkayd in wax laga qabto ciyaartiisa kulankaas.
Argentina ayaa kulanka semi-finalka Koobka Adduunka 2026 kaga adkaatay England 2-1, iyadoo Messi uu qayb weyn ka qaatay guushaas, isaga oo caawiyay labada gool ee ay dhaliyeen Enzo Fernández iyo Lautaro Martínez.
Doodda Messi iyo Ronaldo ayaa weli ah mid ka mid ah doodaha ugu waaweyn kubadda cagta, iyadoo Ronaldo uu ku wajahan yahay gaarista 1,000 gool, halka Messi uu dhinaca kale leeyahay tiro badan oo koobab iyo guulo kooxeed ah.
