Goolhayaha Liverpool, Alisson Becker, ayaa shaaca ka qaaday inuu doonayo inuu kooxda sii joogo wixii ka dambeeya dhammaadka xilli ciyaareedkan, markaas oo uu dhacayo qandaraaskiisa haatan.
Goolhayaha reer Brazil oo 34 jir ah ayaa sheegay inuu ku faraxsan yahay nolosha Liverpool, isla markaana qoyskiisu ay ku qanacsan yihiin magaalada, taasoo ka dhigeysa inuu doonayo inuu sii joogo Anfield.
Alisson ayaa Liverpool kaga soo biiray AS Roma sanadkii 2018, iyadoo lagu soo iibsaday lacag dhan £66.8 milyan, wuxuuna tan iyo xilligaas kooxda u saftay 347 kulan.
Isagoo ka hadlayay mustaqbalkiisa, Alisson wuxuu yiri:
“Haa, maskaxdayda waxaan ku hayaa inaan sii joogo. Waxaan diiradda saarayaa inaan ciyaaro kulan kasta, laakiin waxaan ku faraxsanahay inaan halkan sii joogo.”
Wuxuu intaas ku daray:
“Arrintaasi waxay ku xiran tahay dhinacyo badan iyo xaalado kala duwan. Laakiin rabitaankeygu waa inaan sii joogo, waan ku faraxsanahay halkan, qoyskayguna sidoo kale waa ku faraxsan yahay.”
Alisson ayaa sidoo kale caddeeyay inuusan weli lumin hamigiisa ku aaddan ku guuleysiga koobabka iyo inuu sii ciyaaro heerka ugu sarreeya ee kubadda cagta.
“Weli waxaan u baahanahay inaan ku guuleysto koobab, isla markaana aan sameeyo bandhigyo wanaagsan. Waxaan doonayaa inaan heerka ugu sarreeya ku ciyaaro muddada ugu dheer ee aan awoodo.”
Dhanka kale, Alisson ayaa xaqiijiyay inuusan weli si toos ah ugala hadlin maamulka Liverpool heshiis cusub, balse wakiilkiisa uu wadahadallo kula jiro kooxda.
“Maya, weli aniga si toos ah ugama wada hadlin heshiiska cusub, laakiin wakiilkayga ayaa kooxda kala hadlaya,” ayuu yiri goolhayaha reer Brazil.
Waxaa xusid mudan in Alisson uu horaantii sanadkan tixgelinayay inuu u dhaqaaqo Juventus, hase yeeshee uu ugu dambeyn go’aansaday inuu sii joogo Liverpool.
Dhanka kale, goolhayaha ayaa ka hadlay xaaladda kooxda, isagoo sheegay in Liverpool ay u baahan tahay inay hesho joogteyn dhanka natiijooyinka ah haddii ay doonayso inay u tartanto koobab waaweyn.
Arrintan ayuu ka hadlay kaddib toddobaad adag oo Liverpool ay guuldarrooyin kala kulantay Arsenal iyo Fenerbahce, inkastoo Alisson uu bandhig wanaagsan sameeyay kulankii ay guusha kaga gaareen Crystal Palace, isagoo sameeyay badbaadino muhiim ah.
Wuxuu yiri:
“Xaqiiqadeennu waxay tahay inaanan weli sameynin wax walba oo aan awoodno. Taas macnaheedu ma aha inaan si xun u ciyaareyno, sababtoo ah kulamo badan ayaan si wanaagsan u ciyaarnay, laakiin joogteyntii loo baahnaa weli ma aanan helin.”
Alisson ayaa intaas ku daray in Liverpool ay haysato tababare wanaagsan iyo ciyaartoy tayo sare leh, balse ay tahay inay koox ahaan gaaraan heer kalsooni buuxda ay ku qabaan awooddooda ku aaddan ku guuleysiga koobabka.
“Waxaan leenahay tababare heer sare ah iyo ciyaartoy wanaagsan. Waxaan awoodnaa inaan sameyno waxyaabo waaweyn, laakiin koox ahaan waa inaan gaarnaa heer aan isku kalsoonaano, isla markaana aan haysanno wax kasta oo looga baahan yahay inaan koobab ku guuleysanno.”
Ugu dambeyntii, goolhayaha ayaa sheegay inay tahay in kooxda loo dulqaato inta ay dhiseyso kalsoonida iyo joogteynta, balse ciyaartoyda Liverpool aysan haysan waqti ay ku lumiyaan.
Hadalka Alisson ayaa rajo u noqon kara taageerayaasha Liverpool, kuwaas oo doonaya in goolhayaha reer Brazil uu sii joogo Anfield, maadaama uu sannado badan laf-dhabar u ahaa guulaha kooxda.