Warbixin uu daabacay The Guardian ayaa sheegaysa in maamulka Premier League uu wajahayo cadaadis xooggan oo uga imaanaya kooxaha kale ee horyaalka, kuwaas oo doonaya in Manchester City lagu soo rogo ciqaabta ugu adag ee suurtagalka ah kadib markii lagu helay jebinta xeerar dhaqaale.
Premier League ayaa Talaadadii soo saartay bayaan rasmi ah oo lagu sheegay in guddiga madaxa-bannaan ee baaritaanka uu Manchester City ku helay eedeymihii loo haystay, Kiiska ayaa la xiriiray eedeymo sheegaya in Manchester City ay muddo sagaal xilli ciyaareed ah, laga bilaabo 2009/10 ilaa 2017/18, ku guuldarreysatay inay bixiso xog maaliyadeed oo sax ah oo dhammaystiran.
Waxaa sidoo kale kooxda lagu eedeeyay in aysan si buuxda u soo gudbin faahfaahinta ku saabsan mushaharkii tababarihii hore Roberto Mancini, kaas oo ku saabsanaa xilliyadii 2009/10 ilaa 2012/13, Hadda, kadib markii eedeymaha la xaqiijiyay, waxaa la sugayaa marxaladda xigta ee kiiska oo ah go’aaminta ciqaabta Manchester City. Ciqaabta waxaa si gaar ah looga dhageysan doonaa guddiga madaxa-bannaan kulan dambe.
Sida uu qoray The Guardian, kooxo ka tirsan Premier League oo la tartama Manchester City ayaa cadaadis saaraya maamulka horyaalka, iyagoo doonaya in ciqaabtu noqoto mid keenta in kooxda muddo dheer ka maqnaato heerka ugu sarreeya ee kubadda cagta England, Warbixintu waxay intaas ku dartay in qaar ka mid ah masuuliyiinta kooxaha ay aaminsan yihiin in hal xilli oo kaliya oo Manchester City lagu diro Championship-ka uusan ku filnaan doonin marka la eego eedeymaha lagu helay.
Kooxaha kale ayaa sidoo kale doonaya in dhammaan hannaanka kiiska iyo go’aanka ciqaabta la soo gabagabeeyo ka hor dhammaadka xilli ciyaareedka 2026/27, Sidaas darteed, indhaha ayaa hadda ku sii jeeda guddiga madaxa-bannaan ee qaabilsan go’aaminta ciqaabta, iyadoo Manchester City ay wajahdo mid ka mid ah marxaladihii ugu muhiimsanaa ee kiiskan muddada dheer socday.