Manchester City ayaa wajahaysa xaalad adag kadib markii lagu helay dambiyo la xiriira jebinta xeerarka dhaqaale ee Premier League, waxaana hadda soo baxaya saadaallo ku saabsan in qaar ka mid ah xiddigaha waaweyn ee kooxda ay ka fikiri karaan inay isaga tagaan haddii kooxda loo diro Championship ama xitaa laga saaro horyaalka.
Waxaa Kooxda.com, ciqaabta Manchester City weli lama go’aamin, waxaana kooxda sidoo kale loo oggol yahay inay racfaan ka qaadato go’aanka guddiga baaritaanka. Sidaa darteed, bixitaanka ciyaartoydan waa xaalad suuragal ah oo ku xiran waxa ka dhalan doona dacwadda iyo ciqaabta ugu dambeysa.
Warbixintu waxay sheegaysaa in kooxo waaweyn oo Yurub ah ay durba isha ku hayaan qaar ka mid ah ciyaartoyda City.
Erling Haaland – Real Madrid iyo Barcelona
Erling Haaland ayaa ka mid ah ciyaartoyda ay sida weyn u doonayaan kooxaha waaweyn ee Yurub, iyadoo Real Madrid iyo Barcelona lagu sheegay inay xiiseynayaan weeraryahanka reer Norway.
Haaland wuxuu Manchester City u dhaliyay 169 gool 205 kulan, waana rikoor ka dhigaya ciyaaryahanka mid si weyn loo doonayo haddii uu go’aansado inuu ka tago Etihad Stadium.
Jeremy Doku – Arsenal
Jeremy Doku ayaa lagu xusay inuu noqon karo ciyaaryahan Arsenal ay u dhaqaaqi karto, inkastoo warbixintu aysan sheegin in Arsenal ay hadda si rasmi ah ugu jirto wadahadallo ku saabsan ciyaaryahanka.
Doku ayaa noqon kara xulasho ku habboon garabka bidix ee Arsenal, gaar ahaan kadib bixitaankii Gabriel Martinelli iyo Leandro Trossard sida ay warbixintu tilmaamayso.
Elliot Anderson – Manchester United, Real Madrid iyo Barcelona
Elliot Anderson ayaa sidoo kale lagu daray liiska ciyaartoyda laga yaabo inay helaan dalabyo waaweyn.
Manchester United ayaa xagaagii hore doonaysay Anderson ka hor inta uusan ugu biirin City lacag dhan £116 milyan.
Haddii Manchester City ay wajahdo ciqaab culus, Manchester United ayaa mar kale isku dayi karta saxiixiisa, laakiin warbixinnada Spain ayaa sidoo kale sheegaya in Real Madrid iyo Barcelona ay isha ku hayaan ciyaaryahanka.
Enzo Fernandez – Real Madrid iyo Barcelona
Enzo Fernandez, oo City ay xagaagan ku iibsatay lacag dhan £125 milyan, ayaa isna lagu sheegay inuu bartilmaameed u yahay Real Madrid iyo Barcelona.
Real Madrid ayaa horay u xiiseynaysay ciyaaryahanka reer Argentina, waxaana warbixintu sheegaysaa in Fernandez laftiisu uu danaynayay u dhaqaaqista Madrid.
Haddii City ay wajahdo ciqaab culus, wada-hadalladaas ayaa dib u bilaaban kara.
Gianluigi Donnarumma – Bayern Munich, Chelsea iyo Manchester United
Goolhaye Gianluigi Donnarumma ayaa sidoo kale ka mid ah ciyaartoyda ay kooxo kale xiiseyn karaan.
Bayern Munich ayaa raadinaysa beddelka mustaqbalka ee Manuel Neuer, halka Manchester United ay hore uga fikiraysay saxiixa Donnarumma ka hor inta uusan City ku biirin.
Chelsea ayaa sidoo kale lagu xusay inay xiiseyn karto goolhayaha reer Talyaani ah.
Rayan Cherki – Real Madrid, Barcelona iyo PSG
Rayan Cherki ayaa tan iyo markii uu Manchester City ku biiray noqday mid ka mid ah ciyaartoyda ugu xiisaha badan kooxda.
Warbaahinta Spain ayaa sheegtay in Real Madrid iyo Barcelona ay isha ku hayaan, halka PSG ay sidoo kale noqon karto meel uu ku wajaho haddii uu ka tago City.
Marc Guehi – Liverpool
Marc Guehi ayaa lagu sheegay inuu noqon karo bartilmaameed ay Liverpool dib ugu soo laaban karto.
Liverpool ayaa hore ugu tartantay saxiixa Guehi kahor intii uusan u dhaqaaqin Manchester City. Haddii City ay wajahdo dhibco laga jaro, relegation ama xitaa ka saarid Premier League, Liverpool ayaa laga yaabaa inay mar kale xiiseyso daafaca England.
Josko Gvardiol – Real Madrid iyo Barcelona
Daafaca reer Croatia Josko Gvardiol ayaa isna lagu daray ciyaartoyda ay doonayaan Real Madrid iyo Barcelona.
Gvardiol wuxuu noqday mid ka mid ah daafacyada ugu muhiimsan Manchester City, waxaana bixitaankiisu noqon lahaa khasaaro weyn kooxda.
Si kastaba, arrinta waxaa adkeyn kara xaqiiqda ah inuu bishii July saxiixay heshiis cusub oo shan sano ah.
Antoine Semenyo – Liverpool iyo Arsenal
Antoine Semenyo ayaa sidoo kale lagu sheegay inuu heli karo dalabyo, iyadoo Liverpool iyo Arsenal labadaba lala xiriiriyay.
Liverpool ayaa xiisayn karta ciyaaryahanka, halka Arsenal ay hore u muujisay danayn.
Eedeymaha Manchester City
Premier League ayaa Manchester City ku eedeysay inay muddo sagaal sano ah ku lug lahayd khaladaad la xiriira xogta maaliyadeed iyo heshiisyo lagu tilmaamay kuwo aan dhab ahayn.
Kiiska waxaa ku jiray 130 eedeymo, kuwaas oo ku saabsan xogta dakhliga iyo kharashaadka, mushaharrada tababareyaasha iyo ciyaartoyda, xeerarka UEFA, Profitability and Sustainability Rules iyo wada-shaqeyn la’aanta baaritaanka Premier League.
Manchester City waxay diidday eedeymaha, iyadoo sheegtay inay weli haysato caddeymo ay ku taageerayso mowqifkeeda.
Ciqaabta ugu dambeysa weli lama go’aamin, sidaas darteed magacyada ciyaartoyda lala xiriirinayo kooxaha kale waa xaalado suuragal ah, mana aha heshiisyo la xaqiijiyay.