Xiddiga Real Madrid iyo xulka Faransiiska, Kylian Mbappé, ayaa raalli-gelin ka bixiyay hadal uu ka yiri hoggaamiyihii hore ee Shiinaha, Mao Zedong, kaasoo dhaliyay caro xooggan oo ka dhex dhalatay shacabka Shiinaha, isla markaana sababay in shirkado ganacsi ay joojiyaan heshiisyadii xayeysiinta ee ay la lahaayeen.
Xiisaddan ayaa ka dhalatay wareysi uu Mbappé ka bixiyay barnaamijka The Bridge, oo uu soo bandhigo saaxiibkiisa Real Madrid, Aurélien Tchouaméni. Mbappé ayaa sheegay inuu saaxiibbadiis la wadaago sawir si kaftan ah wejigiisa loogu daray sawirka Mao Zedong, isagoo hoggaamiyihii hore ee Shiinaha ku tilmaamay kaligii-taliye.
Hadalkaas ayaa caro ka dhaliyay baraha bulshada Shiinaha, gaar ahaan Weibo, iyadoo dad badan ay ku eedeeyeen inuu ixtiraam-darro u muujiyay taariikhda dalka iyo dareenka shacabka.
https://t.co/MQBo9NCSy5
— Kylian Mbappé (@KMbappe) October 27, 2026
Shirkado Shiinaha laga leeyahay oo joojiyay heshiisyadii Mbappé
-
Dongpeng: Shirkadda cabitaannada ayaa ku dhawaaqday inay soo afjartay heshiiskii xayeysiinta ee ay la lahayd Mbappé, iyadoo sheegtay inay diiddan tahay fal kasta oo dhaawacaya astaamaha qaranka.
-
Mengniu: Shirkadda caanaha iyo waxsoosaarka cuntada ayaa iyaduna la sheegay inay joojisay wada-shaqayntii ganacsi ee ay la lahayd xiddiga reer France.
-
🚨 Kylian Mbappé: “My favorite Mbappé meme?
The one where they put my face on a Chinese dictator (Mao Zedong).
That really makes me laugh, I use it with my friends all the time.” https://t.co/oKmH8xksLy
— Madrid Zone (@theMadridZone) October 26, 2026
Warbaahinta Shiinaha: Warbixino ayaa sheegay in laga saaray baraha qaar muuqaalladii wareysiyada Mbappé iyo goolashiisa, inkastoo dhammaan tallaabooyinkaas aan si madax-bannaan loo xaqiijin.
La Liga oo raalli-gelin siisay Shiinaha
Warbaahinta Shiinaha ayaa sidoo kale sheegtay in telefishinka dowladda ee CCTV uu hakiyay baahinta kulamada horyaalka Spain, isla markaana laga saaray xayeysiisyo iyo muuqaallo la xiriiray Mbappé.
Dhanka kale, xiriirka horyaalka Spain ee La Liga ayaa raalli-gelin ka bixiyay hadalka Mbappé, isagoo sheegay in hadalladaasi ahaayeen kuwo uu ciyaaryahanku si shakhsi ah u yiri, ayna matalin horyaalka ama kooxihiisa.
Mbappé oo ugu dambayn raalli-gelin bixiyay
Mbappé ayaa bayaan uu soo saaray ku qirtay in hadalkiisu aanu habboonayn, isla markaana uu dhaawici karay dareenka dad badan oo Shiinaha ku nool iyo bulshada Shiinaha ee caalamka.
Wuxuu yiri: “Waxaan raalli-gelin ka siinayaa qof kasta oo hadalkaygu dhaawacay. Taasi marnaba ma ahayn ujeeddadayda. Waxaan ixtiraam weyn u hayaa shacabka Shiinaha iyo taariikhdooda, runtii waan ka xumahay.”
Arrintan ayaa cadaadis ku kordhisay sumcadda ganacsi ee Mbappé ee suuqa Shiinaha, iyadoo ay xiisaddu soo baxday maalin kaddib markii uu kaalinta labaad ka galay tartanka Ballon d’Or 2026, kaasoo uu ku guuleystay Harry Kane.