Xulka qaranka Spain ayaa sii watay bilowgiisa wanaagsan ee UEFA Nations League 2026/2027, kaddib markii uu guul weyn oo 4-1 ah ka gaaray Croatia kulan ka tirsanaa wareegga labaad ee heerka group-yada, Spain ayaa ciyaarta si xooggan ku bilaabatay, waxaana daqiiqaddii 2-aad goolka furitaanka u dhaliyay xiddiga Barcelona ee Lamine Yamal, kaasoo kubbad si qurux badan u tuuray oo shabaqa Croatia dhex dhigtay.
Croatia ayaa jawaab degdeg ah bixisay, waxaana daqiiqaddii 29-aad goolka barbaraha u dhaliyay Dion Beljo, taasoo ciyaarta ka dhigtay 1-1, Laakiin farxadda Croatia muddo dheer ma sii waarin, waxaana laba daqiiqo kaddib, daqiiqaddii 31-aad, Spain mar kale hoggaanka qabatay. Marc Pubill ayaa dhaliyay goolka labaad ee Spain, waxaana caawinta sameeyay Lamine Yamal.
Qeybtii labaad ayuu Yamal sii waday bandhiggiisa cajiibka ah, waxaana daqiiqaddii 63-aad uu dhaliyay goolkiisii labaad ee ciyaarta, isagoo Spain ka dhigay 3-1, Spain ayaa sii waday cadaadiska, waxaana daqiiqaddii 89-aad goolka afaraad u dhaliyay Nico Williams, kaddib kubbad uu kasoo helay Pedri.
Ugu dambeyn, ciyaarta ayaa kusoo dhammaatay Spain 4-1 Croatia, iyadoo Spain ay saddex dhibcood oo muhiim ah qaadatay, Guushan ayaa Spain siisay 6 dhibcood, waxayna hadda hoggaanka u qabatay group-ka. Croatia ayaa leh 3 dhibcood, halka England ay sidoo kale leedahay 3 dhibcood, Czech Republic-na ay weli tahay kooxda aan wax dhibco ah haysan.
Spain ayaa kulankeedii koowaad sidoo kale guul ka gaartay England, iyadoo ku adkaatay 3-2.