Halyeeyga kubadda cagta England iyo gooldhaliyaha ugu sarreeya taariikhda Premier League, Alan Shearer, ayaa sheegay in uusan hubin in Florian Wirtz uu Liverpool ka soo bandhigi doono heerkii laga filayay markii kooxda ay lacag badan ku soo iibsatay, Wirtz ayaa Liverpool ugu biiray Juun 2025, isagoo Bayer Leverkusen uga yimid lacag bilow ah oo dhan £100 milyan, halka £16 milyan oo kale lagu dari karo iyadoo ku xiran shuruudo iyo gunnooyin heshiiska ku jiray.
Si kastaba, xiddiga reer Germany ayaa xilli ciyaareedkiisii ugu horreeyay Anfield ku sameeyay bandhigyo isugu jiray kuwo wanaagsan iyo kuwo aan joogto ahayn. Wuxuu dhaliyay 7 gool, isagoo sameeyay 8 caawin xilli Liverpool ay la kulantay 20 guuldarro tartamada oo dhan.
Shearer ayaa sheegay in Wirtz uu mararka qaar muujiyay tayadiisa, balse uusan weli helin waqti dheer oo uu si joogto ah ugu muujiyo sababta Liverpool ay ugu bixisay lacagta badan: “Weli ma aanan arag kan ugu fiican Florian Wirtz. Waxaan aragnay qaybo ka mid ah, laakiin weli ma uusan sameynin taxane ciyaaro ah oo aad tiraahdo: ‘Wow, ciyaaryahankani waa heer sare,’” ayuu yiri Shearer.
Shearer wuxuu sidoo kale tilmaamay in xawaaraha iyo cadaadiska Premier League ay dhibaato ku noqon karaan Wirtz, gaar ahaan marka uu kubadda helo, maadaama uusan mar walba helin waqti ku filan oo uu ku sameeyo waxa uu doonayo.
“Premier League-ga mararka qaar ma heli kartid waqtiga aad kubadda ku samayn lahayd waxa aad rabto, sababtoo ah ciyaartu waa mid aad u degdeg badan,” ayuu raaciyay.