Xiddiga kooxda Real Madrid, Marc Cucurella, ayaa ka hadlay cadaadiska iyo foorida taageerayaasha ee kooxda ku wajahan tan iyo bilowgii xilli ciyaareedka, gaar ahaan Vinicius Junior iyo Kylian Mbappé.
Real Madrid ayaa wajahday dhaleeceyn xooggan kaddib markii qaab ciyaareedkeedu uu isbedbedelay bilowga xilli ciyaareedka. Cadaadiska ayaa sii kordhay kaddib guuldarradii 2-1 ahayd ee ay Axaddii ka soo gaartay Atlético Madrid, iyadoo Vinicius iyo Mbappé si gaar ah loogu jeediyay dhaleeceyn.
Cucurella ayaa difaacay labada ciyaaryahan, isagoo sheegay in dhammaan kooxda ay masuuliyadda wadaagaan:- “Dhammaanteen waxaan ku jirnaa hal doon. Waxaan ognahay inay jiraan waxyaabo ay tahay inaan ka shaqeyno. Marar badan waxaan isku aragnaa inaan ciyaarta gadaal ka joogno, sidaas darteed waxaan si degdeg ah u weerarnaa, mana siino kooxda naga soo horjeeda fursad ay ciyaarta ku maamusho.”
Wuxuu intaas ku daray in ciyaartoydu ay u baahan yihiin inay si tartiib ah isku fahmaan, isla markaana bartaan goorta la cadaadiyo, goorta kubadda la haysto iyo goorta ciyaarta la dejiyo.
“Xilli ciyaareedku wali wuu dheer yahay”
Cucurella ayaa sheegay in Real Madrid ay doonayso inay kulan kasta si wanaagsan u ciyaarto oo ay guulo waaweyn gaarto, balse uu xilli ciyaareedku wali dheer yahay. “Waxaan rabnaa inaan si fiican u ciyaarno oo aan kulan kasta ku guuleysanno natiijo weyn, annagoo shabaqeena ilaashanayna. Laakiin xilli ciyaareedku wali wuu dheer yahay. Horyaalku wuxuu ka kooban yahay 38 kulan, mana jirto meel qalad kale loo oggol yahay.”
Wuxuu sheegay inuu dareemayo in kooxda ay si wanaagsan u soo hagaagayso, isla markaana ciyaartoydu ay leeyihiin rabitaan weyn oo ay ku doonayaan inay horumar sameeyaan.
Markii wax laga weydiiyay foorida taageerayaasha ee loo jeedinayo Vinicius iyo Mbappé, Cucurella wuxuu sheegay inuu isagu hore ula qabsaday xaaladahan oo kale.
Wuxuu sheegay in waxa isaga yaabka ku noqday ay tahay xawaaraha ay taageerayaashu u bilaabaan foorida, isagoo tusaale u soo qaatay kulan ay la ciyaareen Inter Milan.“Waxaan xasuustaa kulankii Inter Milan. Laba daqiiqo oo keliya ayaa ciyaartu socotay, kubaddana si dhib yar ayaan u taabanay, annagoo difaac ku jirna, haddana taageerayaashu waxay bilaabeen inay fooriyaan .” ayuu yiri
Si kastaba, Cucurella wuxuu sheegay inuu fahamsan yahay sababta taageerayaasha Real Madrid ay sidaas u sameeyaan, maadaama ay kooxda ka filayaan inay gaarto heer sare oo ay soo bandhigto habeenno waaweyn.
Wuxuu sidoo kale sheegay in jawiga cadaadiska badan uu leeyahay dhinac wanaagsan, maadaama ciyaartoydu garoonka u soo galaan iyagoo doonaya inay abuuraan habeenno xusuus leh oo ka dhaca Santiago Bernabéu.
Cucurella ayaa sidoo kale wax laga weydiiyay tartanka Ballon d’Or iyo haddii uu filayo in Mbappé uu ku guuleysan karo abaalmarinta.
Xiddiga reer Spain ayaa sheegay inuusan doonayn inuu saadaaliyo qofka ku guuleysan doona, isagoo tilmaamay inuu nasiib u leeyahay inuu garoonka la wadaago dhowr ciyaaryahan oo ka mid ah musharraxiinta abaalmarinta.
Wuxuu sheegay in haddii ciyaaryahan reer Spain ah uu ku guuleysto, ay taasi noqon doonto wax si buuxda loo mudan yahay marka la eego wixii ay Spain ka qabatay Koobkii Adduunka.
Dhanka kale, haddii Mbappé uu ku guuleysto, Cucurella wuxuu sheegay inuu sidoo kale ku farxi doono, isagoo xusay rikoodhka gooldhalinta ee Mbappé iyo kabta dahabka ah ee uu ku guuleystay.
