Tababaraha xulka Germany, Jürgen Klopp, ayaa amaanay xiddiga Liverpool ee Florian Wirtz, kaddib markii Germany ay 2-0 kaga adkaatay Serbia kulan ka tirsan UEFA Nations League, Klopp ayaa sheegay in Wirtz uu soo bandhigay ciyaar heer sare ah, isagoo xusay in uu si gaar ah u yaqaanay tayada ciyaaryahanka tan iyo markii uu Liverpool yimid.
“Wirtz runtii wuxuu soo bandhigay ciyaar aad u wanaagsan,” ayuu Klopp yiri. Wuxuu intaas ku daray in Wirtz uu yahay ciyaaryahan cajiib ah, isla markaana uusan aaminsanayn inuu ku jiro hoos-u-dhac dhab ah oo dhanka qaab ciyaareedka ah.
Klopp ayaa sidoo kale tilmaamay in Wirtz uu Liverpool ku biiray waqti adag, balse uu filayo inuu si xooggan uga soo laabto xaaladdaas, Inkasta oo Germany ay guul ka gaartay Serbia, Klopp ayaa durba diiradda saaray kulanka xiga ee ay la ciyaarayaan Greece.
Tababaraha ayaa sheegay in Greece ay leedahay koox tayo badan, gaar ahaan weerarka, halkaas oo ay ku jiraan ciyaartoy awood u leh inay ka ciyaaraan meelo kala duwan, Klopp wuxuu sidoo kale sheegay in Greece ay mar hore si qoto dheer ugu difaacatay kulankii ay la yeesheen Germany, isla markaana xulka Germany uusan markaas awoodin inuu si wanaagsan uga jawaabo caqabaddaas.
Wuxuu filayaa in kulanka xiga uu noqon doono mid aad u adag, gaar ahaan maadaama Greece ay hortooda ku ciyaari doonaan garoon ay taageerayaal badan buuxiyeen, taas oo abuuri karta jawi kulul, Klopp ayaa carrabka ku adkeeyay in tallaabada xigta ay tahay in Germany ay awooddo inay ku celiso heerkii ciyaareed ee ay soo bandhigtay kulankii Serbia.
“Waa inaan aragnaa haddii aan awoodno inaan mar kale soo bandhigno heerkan. Taasi waa tallaabada xigta ee horumarkeenna. Ugu dambayn, weli waxaan ku jirnaa marxalad waxbarasho,” ayuu yiri Klopp.
Markii la weydiiyay waxa uu si gaar ah uga helay ciyaartii Germany, Klopp wuxuu sheegay inuu ku qanacsanaa dhammaan qaybaha ciyaarta, laga bilaabo bilowga ilaa dhexda iyo dhammaadka, Wuxuu si gaar ah u amaanay sida ciyaartoydu ugu dhaqaaqayeen gudaha xerada ganaaxa, isagoo sidoo kale sheegay in khadka difaaca uu soo bandhigay qaab ciyaareed aad u wanaagsan.