Xulka Spain ayaa guul xiiso badan ka gaaray xulka England, kadib markii ay 3-2 kaga adkaadeen garoonka Wembley, kulan ka tirsanaa wareegga koowaad ee heerka group-yada UEFA Nations League 2027.
Spain ayaa ciyaarta si xooggan ku bilaabatay, waxaana daqiiqaddii 2-aad goolka furitaanka u dhaliyay Lamine Yamal, kadib qalad uu sameeyay daafaca England ee Marc Guéhi. Yamal ayaa kubadda helay, gudaha xerada ganaaxa galay, waxaana uu si qurux badan u dhaliyay.England ayaa goolka barbaraha keentay daqiiqaddii 36-aad, waxaana u dhaliyay Anthony Gordon. Jude Bellingham ayaa kubadda qaaday kadib dhacdo uu Neco Williams ku dhacay, waxaana uu u gudbiyay Gordon oo markaas shabaqa Spain ku hubsaday.
Wax yar kadib, England ayaa ciyaarta hoggaanka la wareegtay. Harry Kane ayaa daqiiqaddii 41-aad madax ku dhaliyay kubad uu soo qaaday Neco O’Reilly, taasoo ka dhigtay 2-1.
Bilowgii qeybta labaad, England waxay heshay fursad weyn oo ay ciyaarta 3-1 kaga dhigi kartay. Daqiiqaddii 52-aad, VAR ayaa England siisay rigoore kadib qalad uu Rodri ku galay Jude Bellingham. Laakiin Harry Kane ayaa rigoorada ku dhuftey birta, sidaas darteed England ayaa lumisay fursaddii ay ku fogaan lahayd.
Spain ayaa taas ka faa’iidaysatay, waxaana daqiiqaddii 60-aad goolka barbaraha u dhaliyay Álex Baena, iyadoo ciyaartu mar kale noqotay 2-2.
Spain ayaana ugu dambeyn goolka guusha heshay daqiiqaddii 74-aad, markaas oo Mikel Oyarzabal uu shabaqa England ku hubsaday goolka saddexaad.
Sidaas darteed, Spain ayaa 3-2 kaga adkaatay England, waxayna kulanka ka heshay saddexda dhibcood ee ugu horreeya.