Waxaa caawa la ciyaari doonaa kulan xiiso badan oo dhex mari doona kooxaha Bayern Munich iyo Arsenal, kaas oo qeyb ka ah wareegga saddexaad ee heerka horyaalka tartanka UEFA Champions League xilli ciyaareedka 2026/27.
Kulankan ayaa lagu ciyaari doonaa garoonka Allianz Arena ee kooxda Bayern Munich, iyadoo labada kooxood ay doonayaan inay helaan natiijo wanaagsan si ay ugu dhowaadaan ujeeddooyinkooda tartanka.
Arsenal ayaa kulanka soo galaysa iyadoo leh 6 dhibcood, kaddib markii ay guulo ka gaartay labadii kulan ee hore. Gunners ayaa 1-0 kaga adkaatay Napoli, halka ay 3-0 ku garaacday Lille, taasoo muujineysa bilow wanaagsan oo ay ku sameysay tartanka.
Dhanka kale, Bayern Munich ayaa heysata 4 dhibcood. Kooxda reer Jarmal ayaa 5-0 ku xasuuqday Bodo/Glimt, balse waxay barbaro xiiso badan oo 3-3 ah la gashay Viking kulankeedii kale.
Bayern Munich ayaa rajeyneysa inay ka faa’iideysato garoonkeeda iyo taageerayaasheeda si ay saddexda dhibcood uga qaadato Arsenal. Waxaa si gaar ah isha loogu hayaa weeraryahanka Harry Kane, kaasoo dhaliyay saddex gool tartanka Champions League xilli ciyaareedkan.
Arsenal, oo uu hoggaamiyo tababare Mikel Arteta, ayaa iyaduna dooneysa inay sii wadato natiijooyinkeeda wanaagsan, isla markaana muujiso inay awood u leedahay inay guul ka gaarto kooxaha ugu waaweyn qaaradda Yurub.
Kulankan ayaa la filayaa inuu noqdo mid adag, maadaama labada kooxood ay heystaan weerarro awood leh, ayna doonayaan inay xaqiijiyaan saddexda dhibcood.
Waqtiga iyo halka laga daawanayo ciyaarta
- Kulanka: Bayern Munich vs Arsenal
- Tartanka: UEFA Champions League 2026/27
- Garoonka: Allianz Arena, Munich
- Waqtiga Kenya iyo Soomaaliya: 10:00 habeenimo
- Telefishinka: beIN SPORTS 1
- Faalliyaha: Xafiid Darraaji (Hafid Derradji)
Su’aasha ugu weyn ayaa ah: Arsenal ma sii wadan doontaa guulaheeda, mise Bayern Munich ayaa garoonkeeda ku muujin doonta awooddeeda oo ay saddexda dhibcood ku qaadan doontaa?