Fasaxa ciyaaraha caalamiga ah ayaa gabaabsi ah, iyadoo ciyaartoydu ay dib ugu soo laabanayaan kooxahooda maalmaha soo socda, kahor soo laabashada horyaalka Premier League ee dhamaadka usbuucan.
Cabsida iyo xiisaddu waxay sare u kici doontaa magaalada Manchester, maadaama derby-ga u dhexeeya Manchester City iyo Manchester United uu soo socda yahay, waxaana la ciyaari doonaa Axadda garoonka Etihad Stadium.
Labada kooxoodba si tartiib ah ayay xilli ciyaareedka u bilaabeen, iyadoo kooxda Pep Guardiola si gaar ah dhibaatooyin u wajahayso kadib markii ay luminayeen laba kulan oo xiriir ah oo horyaalka ah.
Manchester City ayaa iska lumisay hoggaan 1-0 ah oo ay haysay, iyagoo ugu dambeyn 2-1 looga badiyay Brighton ka hor fasaxa ciyaaraha caalamiga ah, taasoo ku xigtay guuldarro 2-0 ah oo ay ka soo gaartay Tottenham.
Sidaas darteed, Pep Guardiola ayaa u badan tahay inuu si qoto dheer uga fakirayay intii lagu jiray fasaxa, isagoo isku dayaya inuu dejiyo qorshe cad oo uu kaga hortago Manchester United derby-ga — balse hadda qorshihiisa waxaa saameeyay walaac cusub oo dhaawac ah.
Dhanka kale, Ruben Amorim ayaa fasaxa ugu galay isagoo farxad badan, kadib markii Manchester United ay gaartay guushoodii ugu horreysay xilli ciyaareedkan, taasoo ka timid ciyaartii 3-2 ay kaga badiyeen Burnley. Si kastaba ha ahaatee, guushaas waxay la timid khasaare, maadaama laba ka mid ah ciyaartoydiisa ay dhaawacyo kasoo gaareen garoonka Old Trafford.
Omar Marmoush looma heli doono Manchester City kadib dhaawac xaga seedaha jilibka ah oo soo gaaray intii uu ciyaarayay isreebreebka Koobka Adduunka ee xulka Masar ay la yeesheen Burkina Faso Salaasadii.
Manchester City si rasmi ah ayay u waayi doonaan Rayan Cherki, kadib markii la xaqiijiyay in uu garoomada ka maqnaan doono muddo laba bilood ah sababo la xiriira dhaawac muruqa bowdada ah. Xiddigan ayaa ku dhaawacmay kadib guuldarradii kooxda ka soo gaartay Brighton, waxaana dhaawaciisa si rasmi ah loo xaqiijiyay wixii ka dambeeyay kulankaas. Cherki ayaa xagaagan kaga soo biiray City kooxda Lyon.
Waxaa sidoo kale jirta dhibaato dheeraad ah oo ka jirta weerarka Manchester City, maadaama Phil Foden uusan qeyb ka ahayn kooxda kulankii Brighton, halka Savinho isna uu maqnaa.
Si kastaba ha ahaatee, kooxda ayaa rajeynaysa in labadooduba ay dib ugu soo laaban karaan toddobaadkan kahor kulanka derby-ga.
Tababaraha City, Pep Guardiola, ayaa la filayaa inuu bixiyo warbixin rasmi ah oo ku saabsan xaaladooda caafimaad inta lagu jiro shirkiisa jaraa’id ee ka hor ciyaarta.
Waxaa jira warar ka sii xun dhanka dhaawacyada Manchester City.
Mateo Kovacic iyo Kalvin Phillips ayaa muddo dheer garoomada ka maqnaan doona, halka John Stones isna laga shaki qabo ka qeybgalka derby-ga kadib markii uu ka baxay xulka England sababo la xiriira dhaawac muruqa ah.
Abdukodir Khusanov, oo beddel lagu saaray dhammaadkii ciyaartii Brighton sababo la xiriira jug fudud, ayaa la filayaa inuu diyaar u noqdo kulanka Manchester United.
Si kastaba ha ahaatee, difaaca Josko Gvardiol wali ma uusan ciyaarin hal daqiiqad xilli ciyaareedkan, waxaana weli la sugayaa inuu kasoo muuqdo.
Manchester United waxaa haysta dhibaatooyin dhaawac oo ka yar kuwa City, balse daafaca dhexe Lisandro Martínez ayaa weli ka maqan safka kooxda, maadaama uu kasoo kabanayo dhaawac jilibka ah oo muddo dheer ah.
Ruben Amorim ayaa rajeynaya in Diogo Dalot uu ka soo kabsaday dhaawacii uu ugu baxay xulka Portugal, kaasoo lagu sheegay “dhibaato muruqa ah”.
Tababaraha Manchester United ayaa sidoo kale la filayaa inuu bixiyo warbixin ku saabsan xaaladda dhaawacyada Mason Mount iyo Matheus Cunha, kadib markii labaduba ay dhaawacyo kala kulmeen kulankii ay la ciyaareen Burnley.
Be the first to comment