Ra’iisul Wasaaraha UK, Andy Burnham, ayaa noqday masuulkii siyaasadeed ee ugu horreeyay ee ka hadla wararka sheegaya in Manchester City lagu helay ku dhowaad dhammaan eedeymihii loo hayay ee la xiriiray jebinta xeerarka maaliyadeed ee Premier League.
Warbaahinta ayaa Jimcihii sheegtay in guddiga madaxa-bannaan uu Manchester City ku helay 114 ka mid ah 115 eedeymo, kuwaas oo la xiriira xadgudubyo maaliyadeed oo dhacay intii u dhexeysay 2009 iyo 2019.
Burnham oo hadalkiisa lagu daabacay Manchester Evening News ayaa sheegay inuu warka hadda uun maqlay, isla markaana aan weli la gaarin waqtigii gunaanad laga soo saari lahaa.
Wuxuu sheegay inuu doonayo inuu marka hore arko warbixinta rasmiga ah ee guddiga madaxa-bannaan haddii wararkaasi xaqiijistaan.
Burnham ayaa sidoo kale ka digay in si degdeg ah loo gaaro gunaanadyo ku saabsan suurtagalnimada in Manchester City laga xayuubiyo koobab ay hore u qaaday.
Wuxuu xusay in kiiska Manchester City iyo Premier League uu ahaa geeddi-socod dheer oo muran badan uu hareeyay, sidaas darteedna uusan ahayn arrin lagu gaari karo go’aan degdeg ah:- “Dhammaanteen waxaan u baahanahay inaan si faahfaahsan u baarno warbixinta guddiga madaxa-bannaan ka hor inta aan la gaarin wax gunaanad ah,” ayuu yiri Burnham.
Hadda indhaha ayaa lagu hayaa warbixinta rasmiga ah iyo go’aanka kama dambaysta ah ee ciqaabta Manchester City.
