Xiddiga khadka dhexe ee Barcelona, Pedri, ayaa ka hadlay guuldarradii 2-1 ahayd ee kooxdiisa ka soo gaartay Real Madrid kulankii El Clásico ee horyaalka La Liga, isaga oo qirtay in kooxdu ay ku guuldarreysatay inay taageerayaasheeda farxad geliso.
Barcelona ayaa garoonkeeda Camp Nou ku martigelisay Real Madrid, balse kooxda martida ahayd ayaa guusha la hoyatay, kaddib markii Kylian Mbappé uu dhaliyay goolka guusha daqiiqaddii 87-aad.
Pedri ayaa door ku lahaa goolka keliya ee Barcelona, isaga oo baas u sameeyay Raphinha, kaas oo daqiiqaddii 61-aad shabaqa soo taabtay si uu ciyaarta uga dhigo 1-1.
Isagoo ka hadlayay kulanka kaddib, Pedri ayaa yiri: “Horyaalka La Liga weli waddo dheer ayaa ka harsan. Waxaan dooneynay inaan taageerayaasheenna farxad gelinno, laakiin taas waan ku guuldarreysannay.”
Wuxuu intaas ku daray: “Waan murugaysanahay, laakiin waa inaan horay u soconnaa. Safarku weli aad buu u dheer yahay.”
Pedri ayaa sidoo kale sheegay in Barcelona ay ka maqneyd xawaaraha loo baahnaa marka ay kubadda maamulayso, isla markaana ay sameeyeen kubado badan oo si fudud looga qaatay.
“Waxaan ogeyn sida uu kulankani muhiim u yahay, waxaana dooneynay inaan El Clásico ku badinno taageerayaasheenna hortooda. Waxaan garoonka ka baxnay annagoo murugaysan, laakiin waddadu weli way dheer tahay,” ayuu yiri xiddiga reer Spain.
Wuxuu qiray in Barcelona ay u baahan tahay inay wax badan hagaajiso, isaga oo xusay in khaladaadka noocaas ah aan laga sameyn karin kulan ay la ciyaarayaan koox sida Real Madrid oo kale ah, maadaama ay si qaali ah ugu bixiyeen.
Pedri ayaa hadalkiisa kusoo gabagabeeyay in kooxdu ay dooneysay inay ciyaarta badiso oo ay maamusho, balse aysan ku guuleysan qorshaheeda, isaga oo xusuusiyay in ku guuleysiga horyaalka aysan ku xirneyn in kooxdu guuleysato dhammaan kulamada.
Guuldarradan ayaa Barcelona ku reebtay 27 dhibcood, iyadoo weli hoggaanka horyaalka haysa, halka Real Madrid ay gaartay 24 dhibcood.