Myles Lewis-Skelly ayaa bandhig muhiim ah ka sameeyay kulankii England iyo Spain ee UEFA Nations League, isaga oo 20-jirkan Arsenal ka tirsan uu markii ugu horreysay fursad weyn uga helay khadka dhexe ee xulka qaranka kulanka heerka ugu sarreeya. Lewis-Skelly ayaa waqti aad u yar gudaheed kasoo maray isbeddel weyn, maadaama afar bilood ka hor uu ahaa ciyaaryahan booskiisa Arsenal ku waayay, sidoo kalena uusan qayb ka noqon xulkii England ee Koobkii Adduunka, halka maanta uu noqday ciyaaryahan si dhab ah loogu tixgelinayo mustaqbalka khadka dhexe ee England.
Ciyaaryahanka ayaa xilli ciyaareedkii hore muddo dheer ku adkaa inuu helo boos joogto ah oo Arsenal ah. Riccardo Calafiori iyo Piero Hincapié ayaa inta badan laga doorbiday daafaca bidix, halka fursad uu khadka dhexe uga ciyaarana ay u muuqatay mid aad u fog. Xaaladdaas ayaa xitaa keentay in mustaqbalka Lewis-Skelly ee Arsenal su’aalo laga keeno, iyadoo xitaa la rumeysnaa in iibkiisu uu suuragal noqon karo.
Si kastaba, markii Arsenal ay u baahday ciyaaryahan khadka dhexe ah, gaar ahaan xilli Martin Zubimendi uu daal dareemayay, Lewis-Skelly ayaa dib loogu soo celiyay kooxda koowaad, waxaana uu si weyn uga faa’iidaystay fursaddaas. Wuxuu markii ugu horreysay Premier League uga soo bilaabay khadka dhexe kulankii Fulham ee 2-dii May, tan iyo waqtigaasna horumarkiisa ayaa si weyn loo dareemay.
Lewis-Skelly wuxuu sidoo kale door muhiim ah ku lahaa safarkii Arsenal ee Champions League, isagoo bandhig fiican ka sameeyay semi-finalkii ay la ciyaareen Atlético Madrid, halka uu sidoo kale ciyaaray finalka, inkastoo Arsenal ugu dambeyn koobka ku weyday PSG oo rigoorayaal ku qaaday.
Inkasta oo horumarkiisu uu yimid xilli dambe, haddana Thomas Tuchel ayaa muddo dheer aaminsanaa tayada ciyaaryahanka. Lewis-Skelly wuxuu xitaa ahaa ciyaaryahankii dhaliyay goolkii ugu horreeyay ee xilligii Tuchel uu maamulayay England, markaas oo uu daafaca bidix ka ciyaaray kulankii Albania ee March 2025.
Kadib markii uu xilli ciyaareedkan si wanaagsan ku bilowday, Tuchel ayaa mar kale ugu yeeray xulka England. Kulankii Spain, oo ah koox ka mid ah xulalka ugu awoodda badan caalamka, ayuu Lewis-Skelly helay fursad weyn, gaar ahaan markii Declan Rice uu sababo la xiriira taam ahaanshihiisa uga baxay kooxda. Tuchel ayaa go’aansaday inuu Lewis-Skelly ka hormariyo Alex Scott, isaga oo khadka dhexe kula ciyaaray Elliot Anderson.
Bilowgii kulanka ma ahayn mid sahlan. Lewis-Skelly ayaa sameeyay qalad uu kubadda si toos ah ugu dhiibay Marc Cucurella, kaas oo gudaha xerada ganaaxa galay, inkastoo isku daygiisii uu ugu dambeyn noqday koorno. Sidoo kale wuxuu la kulmay cadaadis xooggan oo kaga yimid ciyaartoyda Spain, gaar ahaan Lamine Yamal iyo khadka dhexe ee ay hoggaaminayeen ciyaartoy khibrad badan leh.
Laakiin ciyaaryahanka Arsenal ma uusan oggolaan qaladkaas inuu saameeyo. Markii ciyaartu sii socotay ayuu bilaabay inuu kalsooni badan yeesho, isagoo kubadda dalbanayay, saaxiibbadiisana tilmaamayay meelaha uu doonayo in kubadda loo soo dhiibo. Mararka qaar wuxuu gadaal ugu soo laabanayay labada daafac dhexe dhexdooda si uu u sameeyo saddexda daafac, halka marka Spain ay gool-kick qaadanayso uu hore ugu dhaqaaqayay si uu ula socdo Rodri.
Mid ka mid ah daqiiqadihii ugu xiisaha badnaa ayaa timid markii Lewis-Skelly uu kubadda la baxay, isagoo ka gudbay cadaadiska Rodri, kadibna gudaha xerada ganaaxa u dhaqaaqay, Wuxuu hoos ugu dhacay cadaadis uu saaray Pau Cubarsí, laakiin garsooruhu ma uusan siin rigoore.
Qeybtii labaad ayuu Lewis-Skelly sii kordhiyay kalsoonidiisa. Wuxuu si qurux badan u xakameeyay kubad sare oo laabta ah, wuxuuna ku dhowaaday inuu caawiyo Bukayo Saka markii uu kubad dhex dhigay weeraryahanka Arsenal, balse daafaca Spain ayaa daqiiqaddii ugu dambeysay ka hortagay fursaddaas.
Intii uu ciyaarta ku jiray ayuu sidoo kale isku dayay inuu gool dhaliyo, isagoo meel ka baxsan xerada ganaaxa ka toogtay kubad uu doonayay inuu kaga yaabsado Unai Simón, balse goolhayaha Spain ayaa si toos ah u qabtay.
Kulanka Spain wuxuu ahaa imtixaan aad u adag, gaar ahaan iyadoo xulka Spain uu leeyahay khad dhexe oo tayo iyo khibrad badan leh. Lewis-Skelly ma uusan sameyn ciyaar aan qalad lahayn, balse wuxuu muujiyay wax ku filan oo muujinaya inuu heerkaas la jaanqaadi karo.
Waxa ugu weyn ee kulankan laga dheehan karo ayaa ah in Lewis-Skelly uu si tartiib ah uga beddelmayo ciyaaryahan inta badan daafaca bidix ka ciyaara, una muuqda ciyaaryahan awood u leh inuu mustaqbalka door muhiim ah ka qaato khadka dhexe ee Arsenal iyo xulka England.
Afar bilood gudahood, Lewis-Skelly wuxuu kasoo gudbay xilli uu Arsenal boos ka waayay iyo inuu seego Koobkii Adduunka, ilaa uu hadda noqday ciyaaryahan Thomas Tuchel uu siinayo fursad uu ku caddeeyo inuu ka mid noqon karo jiilka cusub ee khadka dhexe ee England.