Kooxda Manchester United ayaa shaqada ka ceyrin doonta tababare Michael Carrick haddii ay guul-darro culus kala kulmaan Aston Villa kulanka horyaalka Premier League ee maalinta Axadda, sida ay ku warrantay shabakadda Football Insider.
Inkastoo United ay bartamihii toddobaadkan guul ka gaartay Roma, haddana waxay ahayd guushoodii ugu horreysay 10 kulan ka dib, iyo middii saddexaad oo keliya xilli-ciyaareedkan tartamada oo dhan.
Wariye Pete O’Rourke ayaa tilmaamay in haddii ay kooxda Unai Emery si xun uga adkaato United, ay maamulku ka faa’iideysan doonaan fasaxa xulalka qaranka si ay isbeddel u sameeyaan, inkastoo taageerayaashu ay weli taageersan yihiin Carrick.
Eddie Howe ayaa loo arkaa dookha koowaad ee United haddii la ceyriyo Carrick, maadaama bartilmaameedkoodii riyada ee Unai Emery uu qarka u saaran yahay inuu qandaraas cusub u saxiixo Aston Villa.
Dhanka kale, wariyaha shabakadda The Athletic ee Laurie Whitwell ayaa qaba aragti taas ka duwan, isagoo u sheegay Stretford Paddock in madaxda United ay go’aansadeen inay Carrick fursad siiyaan ilaa laga gaarayo fasaxa xulalka si dib-u-qiimeyn loogu sameeyo, isla markaana aysan jirin wax wadahadal ah oo ay la fureen tababarayaal kale, taas oo muujinaysa in shaqadiisu ay ammaan tahay.